Viti i Ri , ekran i mbushur me humor

Admirina Peçi
Humori, filmat premierë dhe transmetimet e drejtpërdrejta do të jenë në qendër të programeve që do të shfaqen në ekranet e televizioneve kryesore në Shqipëri. Si për çdo vit, televizioni Publik Shqiptar e ka përcaktuar pikën e fortë të programit të tij. Ka zgjedhur sërish humorin, me humoristët më të mirë në të gjithë vendin për të mbushur minutat më të ndjekura në ndërrimin e viteve. Prej më shumë se dy muajve, stafi i këtij televizioni ka nisur përgatitjet për këto programe. Skenaristi Vangjel Kozma, regjisori Ilir Bega, skenaristi Leonard Gjata, koreografi Arjan Sukniqi, drejtori i fotografisë Valter Qarri, udhëheqësi artistik Ëngjëll Ndocaj dhe drejtori i këtij programi, Ferdinand Samarxhi, kanë caktuar më së fundi kinokomeditë më të zgjedhura, këngëtarët që do të përshëndesin në këtë program të madh, filmat premierë që do të shfaqen në tre netët e Vitit të Ri, e paralelisht me këtë kanë përgatitur një program të veçantë edhe për krishtlindjet.
Nga studiot e TVSH tek humori i rretheve
Programi i madh i natës së ndërrimit të viteve, është projektuar ndryshe nga vitet e tjera. I gjithë programi është menduar si një komedi e madhe, e cila në brendësi të saj ka shumë komedi të vogla. Të ftuara speciale për këtë program janë të mirënjohurat motrat Juli dhe Rita Ndoci, të cilat vijnë enkas nga Gjermania për të qenë protagoniste të këtij programi të madh të Vitit të Ri. Të dyja motrat Ndoci, së bashku edhe me humoristë të tjerë si Fadil Hasa, Aleko Prodani, etj, do ta kalojnë humorin nga studiot e TVSH-së, drejt e nëpër rrethe, atje ku janë xhiruar shumë kinokomedi nga estradat e rretheve. Siç pohon Samarxhi, këtë vit teleshikuesit do të ndiejnë nga afër humorin e madh të artistivëve shkodranë. Sipas tij, humoristët e Shkodrës do të jenë në qendër të këtij programi me materialin e tyre “Dhëndurët”, i shkruar nga Besnik Çinari, e ku bëhet fjalë për dy vajza shqiptare që janë martuar me dy burra të huaj, një italian dhe një arab. Me plot humor dhe surpriza do të shfaqen në këtë program edhe humoristët korçarë me pjesët “Pronat”, “Në spital”, “Dyqani”, etj, ku aktorë të njohur si Aleko Prodani etj do të sjellin, veç problemeve dhe plagëve shoqërore, edhe humorin e tyre.
Aktorët e Durrësit janë prezentë në këtë program me mjaft materiale si “Dogana”, “Pleqtë”, etj. Por veç këtyre numrave të humorit, kjo estradë sjellë edhe njëherë në këto komedi humorin e aktorit Fadil Hasa. Ndërsa aktorët e Fierit do të paraqiten në këtë program me skeçin komedi “Mbledhja e këshillit”. Po ashtu me një numër mjaft të veçantë humoristik do të prezantohen edhe aktorët e Estradës së Tiranës, me materialin e tyre “Nëna dhe fëmija”. Parodistët e Vlorë për këtë vit kanë qëmtuar probleme dhe fenomene të reja nga qyteti i tyre, të cilat do t’i prezantojnë me meloditë e tyre të regjistruara nga kompozitori Edmond Zhulali. Por ky program që është ideuar për mëse tre orë do të ketë në minutat e tij edhe mbi 25 këngëtarë të muzikës së lehtë dhe popullore të cilët do të sjellin materiale të zgjedhura nga krijimtaria e tyre. Ndërsa festa e madhe në sheshin e kryeqytetit që është një traditë e përvitshme, do të përcillet drejtpërdrejt nga televizioni Shqiptar, i cili do të instalojë kamerat dhe autobusin e tij në këtë shesh.
Të tjera kinokomedi…
Sipas drejtorit të programacionit, Ferdinand Samarxhi,jashtë këtyre tre orëve program të posaçëm janë përgatitur edhe një varg komedish të tjera, filma premierë, dhe lidhje të drejtpërdrejta. Kështu filmi “Ç’u nise nga Drashovica” me skenar të Vangjel Kozmait dhe regji të Ilir Begës, është bërë gati për transmetim. Po ashtu edhe skenaristi Leonard Gjata po përfundon dy kinokomedi të përgatitura me aktorë dhe studentë të Akademisë së Arteve, të cilat do të jepen në një prej netëve të Vitit të Ri. Por sipas drejtorit të këtij programi, Ferdinand Samarxhi, edhe regjisori Arjan Çuliqi po përgatit një film tjetër humoristik për natën e Vitit të Ri. E veç këtyre materialeve TVSH ka filmuar edhe “Sofrën Shkodrane” të cilën qyteti i Shkodrës e ka traditë të përvitshme. Sidoqoftë, si një e veçantë e këtij viti përmendet edhe mbështetja financiare që është dhënë posaçërisht për këtë program, gjë që sipas Samarxhiut, e ka lehtësuar punën e krijuesve, që programet të pregatiten më me nivel.

Xhirime në natyrë
Për herë të parë komeditë e vogla të vitit të Vitit të Ri do të xhirohen në natyrë. Me një kamera në dorë, grupi realizues i këtyre minikomedive kanë dalë jashtë dhe kanë zgjedhur vendin më të përshtatshëm për të xhiruar pjesën e tyre. Kjo gjë është bërë me të gjithë estradat e rretheve, si ajo e Korçës, e Shkodrës, e Fierit, e Vlorës, e Durrësit, e Tiranës, etj. Skenaristi i programit të madh të vitit të ri, Vangjel Kozmai, thotë se këtë vit është synuar që këto materiale të mos mbeten më brenda studiove ku janë xhiruar deri një vit më parë, por të kërkohet një tjetër atmosferë, me qëllim që të krijohet një tjetër imazh i këtyre komedive. “Kësisoj këto materiale marrin vlera të tjera, i afrohen më shumë filmit, kanë tjetër dinamizëm dhe figurë shumë të bukur”,- thotë Kozmai.

Program i veçantë për Krishtlindjet
Për programin e Krishtlindjeve është menduar që këtë vit të ketë një atmosferë shumë më festive se vitet e kaluara. “Këtë vit, ndryshe nga vitet e kaluara, TVSH ka menduar dhe është përgatitur që festat e Krishtlindjeve të realizojë programe me dinjitet dhe transmetime të drejtpërdrejta”,- thotë Ferdinand Samarxhi, drejtor i përgjithshëm i programacionit. Sipas tij, është vendosur dje në një mbledhje të drejtorit të përgjithshëm të RTSH Artur Zheji, që festat e Krishtlindjeve në TVSH, duhet të sjellin një tjetër imazh të programeve në TVSH. Kështu krahas transmetimit të drejtpërdrejtë që do të realizohet nga të dy katedralet, sonte në orën 24:00 në katedralen e Shën Palit dhe nga katedralja e Ungjillizimit, nesër në mëngjes. Televizioni Shqiptar ka përgatitur për transmetim edhe filma që i kushtohen kësaj ngjarjeje të madhe të lindjes së Jezu Krishtit. Sot do të fillojë transmetimi i filmit “Jezusi i Nazaretit”. “Por krahas këtij filmi, do të transmetojmë edhe dokumentarë për jetën e Jezu Krishtit”,- thotë Samarxhi, duke shtuar se kësaj feste do t’i mbështillen edhe mjaft koncerte të bukura që televizioni publik Shqiptar ka realizuar kohët e fundit me orkestrën e RTSH dhe artistë të mirënjohur në katedralen e Shën Palit.

Televizionet private, më pak program
Televizionet private, edhe pse nuk kanë përgatitur ndonjë program shumë të pasur, sërish nuk do të qëndrojnë jashtë atmosferës së kësaj feste. Televizioni Top Chanel ka përegatitur një program të veçantë për Vitin e Ri e megjithatë stafi drejtues i tij ende nuk ka nisur t’i zbulojë surprizat. Ndërsa televizioni “Klan” ka vendosur të fusë atmosferën e këtyre festave në të gjitha programet që do të transmetohen gjatë këtyre kohëve. Producenti dhe drejtori i programacionit në TV Klan, Petrit Beci, pohon se në të gjithë këto programe do të ketë elementë specialë. “Megjithatë, ne nuk kemi menduar të përgatisim një program krejtësisht special për Vitin e Ri. Kjo është e kushtueshme, dhe ne si televizion privat nuk fitojmë asgjë, përveç kënaqësisë së publikut. Por për t’i bërë pak më të veçantë netët e kësaj feste do të mundohemi t’i pasurojmë programet në “TV Klan”. Kështu do të ketë filma premierë të zgjedhur, elementë të zgjedhur nga “Porta e fatit”, etj”.

(marre nga Shekulli)