Mesfushori ynë e kundërshton kategorikisht marrjen e ndonjë substance të ndaluar dhe beson se testi i dytë do ta shfajësojë plotësisht

Çështja "Kola". "E pabesueshme..."

Nga Athina, Ramadan BIGZA

Kështu shkruan "Sportime", një nga gazetat më të mëdha sportive, që del në Greqi. "Nuk kam marrë asnjë substancë të ndaluar. Testi i dytë, jam i sigurt, do të më shfajësojë plotësisht..." Kështu, me tone të forta dhe i prerë në mendimet e tij, foli Bledar Kola para drejtuesve të Kalitheas. Mjeku i skuadrës, Steriu Karakiçu, këshilltari ligjor Andrea Çoku dhe trajneri Babi Tenes, u mblodhën urgjent për të shqyrtuar rastin "Kola". Por futbollisti ynë u tregua i prerë dhe foli me ton të lartë, duke qenë i sigurt se nuk ka përdorur asnjë substancë të ndaluar. "Të jeni të bindur për këtë,- u tha atyre Kola.- Testi i dytë do të më shfajësojë plotësisht."
Çështja "Kola" ka sensibilizuar të gjithë shtypin sportiv grek. Dhe kjo sepse mesfushori i kombëtares shqiptare ka qenë modeli i një futbollisti, që për më shumë se 10 vjet është shquar jo vetëm për nivelin cilësor të lojës, por edhe për sjelljen e tij shembullore, jo vetëm në fushat e futbollit, por në të gjitha ambientet. Ndaj shqiptarët gjithnjë e kanë ndier veten krenarë, kur në nivelet më të larta të futbollit helen i ka përfaqësuar një futbollist i nivelit të tillë, por edhe një njeri i formuar në të gjitha drejtimet. Natyrisht, këto fjalë të shkruara nga një shqiptar, mund të duken të zakonshme. Por, kur me të tilla superlativa shkruan edhe shtypi grek, atëherë gjithçka bëhet më e pranueshme, më domethënëse dhe, sigurisht, merr vlera më të mëdha.
Gazeta më e madhe sportive "Sportime" i ka kushtuar një faqe të tërë Bledar Kolës, ku, ndër të tjera, shkruan: "Flet, lexon dhe shkruan në katër gjuhë. Ka studiuar për mjekësi dhe muzikë, veçanërisht për kitarë. Eshtë thellësisht fetar dhe admirues i historisë. U rrit duke studiuar mitologjinë greke dhe më vonë Sokratin dhe Platonin. Leximi është pjesë e pandarë e jetës së tij. Lexon gjithçka: nga Bukovski, Kadare, Redfild etj. Shqiptari, banues i vendit tonë, Bledar Kola, vetëm një çështje rastësie nuk është.
Mbiemri i tij do të thotë në latinisht "i pastër". Siç ka thënë vetë në një intervistë për revistën e Panathinaikosit "Panathinaiko trifili", u rrit në një familje, që kishte si qëllim të parë të saj edukimin, që të nxjerrë fëmijë që t'i dalin zot mbiemrit të tyre. Lajmi që u përhap, se ka përdorur substancë të ndaluar një njeri që për 12 vjet në Greqi nuk ka dhënë as shkakun më të vogël për kritika, nuk mund veçse të duket i pabesueshëm.
Në kundërshtim me bashkëpatriotët e tij emigrantë ekonomikë, në Greqi nuk e solli varfëria, por dashuria për topin. Një dashuri, që e mërziti familjen e tij. Si bir i një oficeri të lartë të marinës, do të duhej të merrej me librat, me muzikën, me këngën. Veçse familja kishte atë nivel sa t'ia respektonte lirinë e zgjedhjes. Dhe kur Bledari, që mban emrin e një princi të periudhës së Ilirisë, donte të merrej me topin, asnjë nuk e pengoi. Vetë ai nuk i braktisi studimet e tij, as kur në moshen 15-vjeçare filloi të luante me skuadrën e Besëlidhjes dhe as kur më vonë shkoi te Partizani. Dashuria e tij për futbollin ishte ajo që e detyroi të marrë vendimin për të lënë vendin e tij dhe për të ardhur në Greqi. "Dashuria ime,- thotë Kola,- ishte gjithmonë futbolli."
Shtypi vendës jep pastaj historinë e Bledar Kolës në tokën helene. Më 1991, Kola njeh në Selanik Angjelos Anastasiadhisin, aktualisht trajner i Paokut dhe një nga më të mirët e kampionatit grek, dhe vendos ta ndjekë te skuadra e Panarjiakos. Në vitin 1994, Kola vjen në Athinë dhe lidh një kontratë me Apollonin, ku gjen ish-trajnerin e njohur, të ndjerin Janis Pathiakaqin, dhe Demi Nikolaidhin, aktualisht futbollisti më i mirë i Greqisë. Skuadra modeste e Apollonit, në sajë të kësaj tresheje, arrin të dalë në finalen e kupës së Greqisë dhe fiton për herë të parë daljen e saj në Kupën UEFA.
Klasi i lartë i Bledar Kolës bie në sy të superklubeve greke. Në fillim është Olimpiakosi, por në vitin 1996 ai vesh fanellën e një tjetër klubi të madh, Panathinaikos, ku aktivizohet për më shumë se 4 vjet. Veçanërisht në sezonin 1999 2000, bën një kampionat shumë të mirë. Ishte lojtari që shënoi në minutën e 92 të golin fitues në derbin me AEK un, duke siguruar për "tërfilin" një vend në Champions League. Stacioni tjetër i Bledar Kolës u bë AEK-u, një nga tri ekipet më të mëdha të Greqisë. Nënshkruan një kontratë me verdhezinjtë në janar të vitit 2001 dhe shpjegon se "ajo që më bëri të zgjedh AEK un ishte historia e tij, e cila lidhet me ortodoksinë dhe bizantin." Por tek AEK-u, klubi i tij i dashur, e shqetësojnë dëmtimet. Verën e kaluar, ai mbetet i lirë dhe nuk largohet nga Athina, por lidh një kontratë me Kalithean. "Në të gjitha këto vite të qëndrimit të Bledar Kolës në Greqi,- shkruan "Sportime",- ai asnjëherë nuk ka dhënë shkakun më të vogël për t'u përfolur negativisht, ai gjithnjë ka qenë shembullor. Dhe të gjithë që e njohin Kolën, kanë për të thënë fjalët më të mira për karakterin e tij dhe për sjelljen e tij, që ishte një model.
Gustoja e tij është e thjeshtë: ai u ikën bareve dhe grumbullimit të njerëzve. Preferon restorantet e qeta, dashuron muzikën dhe leximin. Eshtë shumë i njohur me zhvillimet në botë. Në gazeta lexon me të njëjtin interes faqet sportive dhe analizat politike. E quan vendin tonë atdheun e dytë të tij dhe indinjohet me ata, që nxjerrin vetëm anën negative të shqiptarëve. Siç e ka thënë vetë, "sado që mundohem të tregohem i ashpër me të ashprit, jam njeri që i dashuroj të gjithë."
Tek lexon këto fjalë të shkruara në një nga faqet e gazetave më prestigjioze greke "Sportime", të shtohet edhe më shumë respekti për futbollistin tonë dhe besimi se ai vërtet është i pafajshëm. Stoicizmi i Kolës në qëndrimin e tij dhe betimi se nuk ka përdorur asnjë substancë të ndaluar, le të jetë edhe besimi ynë për ta parë njeriun që ka ditur të falë krenari, sa më shpejt në radhët e Kalitheas, pse jo edhe në ekipin kombëtar. Ky besim të shtohet edhe më shumë, kur të dhënat e reja thonë se Kola nuk ka përdorur narkotikë të tipeve të forta, por hashish, që vlerësohet një "drogë e butë" nga drejtësia sportive. Në qoftë kështu, mesfushori i Kalitheas vështirë se mund të dënohet për një kohë që mund t'i kalojë dy muajt. Megjithatë, ne besojmë te fjalët e Kolës, që thotë se nuk ka marrë asnjë substancë të ndaluar dhe te bindja e tij se testi i dytë do ta nxjerrë përfundimisht të pafajshëm.
Të presim.

(marre nga sporti shqiptar)