Viti që lamë pas ka qenë i vështirë për Partinë Socialiste nga ana financiare, ndonëse nga ana politike i siguroi ardhjen në pushtet. Partia qeverisëse në pushtet është në borxh me bankat. “Shekulli” ka mundur që të sigurojë raportin vjetor financiar të depozituar nga kryefinancieri i Partisë Socialiste, Gent Gazheli, në Komisionin Qendror të Zgjedhjeve, ku rezulton se gjendja e saj financiare në fund të vitit është me minus 8.8 milionë lekë, pasi ka marrë Over Draft në bankë në vlerën (10.000.000 lekë) si dhe me 5 milionë fatura telefoni dhe kancelari të papaguara. Pra, në total rreth 13.8 milionë. Financimi nga buxheti i shtetit përbën rreth 60% të të ardhurave, ndërkohë që donacionet zënë 27%, kuotat e deputetëve dhe të tjerë 5.3% dhe të tjerat 7.7%. Në fillim të vitit 2013 gjendja e saj financiare ka qenë 1.169.645 lekë. Për këtë qëllim, Partia Socialiste kërkon me ngulm prej Komisionit Qendror të Zgjedhjeve që të shpërndajë fondet e buxhetit të shtetit të parashikuara për vitin 2014, pasi sipas saj, situata financiare tregohet edhe nga raporti. PS ka përfshirë në raport edhe shpenzimet dhe donacionet për fushatën zgjedhore.
Të ardhurat
Të ardhurat gjatë vitit që lamë pas për Partinë Socialiste kanë qenë në vlerën 166.512.151 lekë. Pjesa më e madhe e financimit është mbuluar nga buxheti i shtetit në vlerën rreth 72.8 milionë lekë, ndërsa financimi për fushatën e 23 qershorit ka qenë në vlerën 26 milionë. 10 milionë lekë janë tërhequr nga ky subjekt nga banka në formë Over Drafti. Qiraja nga ambientet e kësaj force politike kanë qenë rreth 4.2 milionë. Nga tabela e pasqyrimit të financimit të Partisë Socialiste rezulton se deputetët e PS-së kanë kontribuar në vitin që mbyllëm vetëm 8.9 milionë lekë, ndërsa 44.5 milionë lekë kanë qenë donacione nga individë të ndryshëm ose subjekte private. Nga donacionet, pjesa dërrmuese e saj, ose rreth 43.5 milionë është përdorur për fushatë në zgjedhjet e përgjithshme që e sollën këtë forcë në pushtet, ndërsa rreth 1.8 milionë për karburant për fushatën përmes kuponave. Gjatë vitit 2013 , për PS-në kanë dhënë donacione me shuma 500 mijë lekë vetëm dy persona. Për donatorët e fushatës së 23 Qershorit është raportuar nga auditi në KQZ sipas listës së dhurimeve. Në raport sqarohet se të gjithë dhuruesit kanë nënshkruar deklaratën e mospasjes konflikt interesi në përputhje me nenin 89 të ligjit nr.10019, datë 29.12.2008 të “Kodit zgjedhor të Republikës së Shqipërisë”. Në të gjitha rastet dhuruesit kanë respektuar kërkesën ligjore sipas së cilës dhurimi nuk mund te jetë më shumë se 1.000.000 lekë për çdo rast, ndërsa thekson se nuk ka pasur sponsorizime në para nga persona juridikë vendas apo të huaj.
Shpenzime
Shpenzime e përditshme për stafin apo personelin që punon për Partinë Socialiste në vit shkon në 35.9 milionë lekë, ndërsa 1.3 janë për energjinë elektrike. Shpenzimet për celularë shkojnë në 3 milionë lekë. Si forca më e madhe në vend dhe me aktivitete të shumta, rreth 12 milionë kanë shkuar për hotele, dieta dhe udhëtime. Fushata për zgjedhjet ka shkuar në 187 milionë lekë, ndërsa sallat e marra me qira 2.9 milionë lekë. Vetëm për fushatë, pagesa ndaj kompanive celulare ka qenë 2 milionë lekë, ndërsa shpenzime të tjera kanë arritur në vlerën e 28 milionëve. Për të gjitha shpenzimet, vetëm 5.6% janë likujduar nëpërmjet arkës dhe janë të dokumentuara me fatura tatimore dhe kuponin e kasë. Ndërsa 94.4% e shpenzimeve janë likujduar me bankë me dokumentacion të rregullt tatimor. Siç shihet, shpenzimet janë të pa paguara në vlerën 123.008.270 lekë. Nga materiali i auditit të fushatës i cili është pranë KQZ rezulton se 107.105.373 lekë janë të pa paguara. Pra përveç 10 milionëve që është marrë overdraft në bankë, PS ka të pa paguara edhe 5.9 milionë lekë shpenzime telefonike dhe kancelari.
PS shtohet me 3 mijë anëtarë të rinj
Ndryshe nga situata financiare, PS shfaqet në rritje sa i përket numrit të anëtarëve. Partia Socialiste figuron që të ketë deri në 31 dhjetor 105.160 anëtarë të regjistruar. Në të gjithë vendin janë të ngritura 4920 organizata, ndërsa asamble të bashkive dhe të komunave 385. Krahasuar me një vit më parë, anëtarësia e socialistëve është shtuar me rreth 3 mijë anëtarë. Në vitin 2012, që nuk përkonte me një vit zgjedhor, anëtarësia ka qenë 102 155 anëtarë. Por edhe numri i organizatave të kësaj force është rritur gjatë 2013-s, kjo e lidhur ngushtë edhe me zgjedhjet e përgjithshme parlamentare, ku përgjithësisht forcat politike ristrukturohen dhe vënë në punë të gjithë makinerinë e tyre. Në vitin 2012 kanë qenë 4856 organizata. Pra , janë shtuar rreth 64 organizata më shumë.
Raporti: Me kalimin në opozitë, PD-së i bie vlera monetare
Krahasuar me një vit më parë , vlera e Partisë Demokratike kushton 106 milionë lekë më pak. PD e justifikon me ndryshimin e godinës, edhe pse sipërfaqja e saj është më e madhe.
Viti 2013 ka qenë edhe viti i mbrapshtë për Partinë Demokratike. Jo vetëm që humbi pushtetin duke kaluar pas 8 vitesh në opozitë, por ka pësuar një rënie drastike edhe në vlerën e saj monetare. Më raportin e përgatitur nga i ngarkuari i Kryesisë së PD-së, Keltis Kruja, rezulton se pasuria në fund vitit është 127.008.712 lekë. Kjo është një përgjysmim i vlerës, nëse do ta krahasojmë me vitin 2012, kur PD ishte në pushtet. Në 2012-n rezultonte se pasuria e saj ishte 233.5 miliardë lekë. Në argumentin e paraqitur nga PD-ja për këtë rënie drastike të vlerës së saj, vlera e re është si rezultat i dorëzimit të ish- godinës së PD-së, sipas VKM-së nr. 651, dt.16/8/013 , “Për kalimin në përgjegjësi administrimi nga Ministria e Mbrojtjes te Ministria e Brendshme,të pasurisë të paluajtshme “Shtëpia Qendrore e Ushtrisë” me qëllim pajisjen e Subjektit Partia Demokratike e Shqipërisë me ndërtesë për seli qendrore. Por , ajo që ngre pikëpyetje të shumta është vlerësimi që PD i ka bërë vlerës së godinave. Ndërtesën e vjetër të saj, PD e vlerëson me 168.7 milionë lekë, ndërsa çuditërisht, ndërtesën e re të SHQUP-it e vlerëson me 29 milionë lekë. Duhet thekuar se sipërfaqja e ndërtesës së re është shumëfish më e madhe se sipërfaqja e godinës së vjetër. Në raportet e depozituara në KQZ, ndryshe nga raporti i PS-së që ka përfshirë edhe financimet e fushatës në zgjedhje, PD ka paraqitur vetëm veprimtarinë e saj financiare vjetore.
Të ardhurat
Të ardhurat e PD-së kanë qenë më të larta krahasuar me një vit më parë. Nga 65 milionë lekë , të ardhura kanë arritur në 94 milionë lekë. Pjesa më e madhe është financim nga buxheti i shtetit. Duke qenë forcë e parë politike, vjet PD siguroi pjesën më të madhe të “tortës”, të ndarë nga KQZ. Buxheti saj krahasuar me vitin 2012 do të rritej me 30 milionë lekë. Edhe deputetët do të tregoheshin më dorëlëshuar nga PD për vitin që lamë pas duke paguar rreth 4.2 milionë lekë. Të ardhurat e anëtarësisë, sikurse të gjitha subjektet e tjetra politike, zënë një vlerë tepër modeste. Kuotat e anëtarësisë për PD-së, zënë vetëm 1.5 milionë lekë.
Shpenzimet
Në total shpenzimet e Partisë Demokratike të realizuara gjatë vitit 2013 janë 61.395.663 lekë. Në vitin që mbyllëm, demokratët janë treguar më të kursyer me shpenzimet duke i ulur ato me 4 milionë lekë. Pagat dhe sigurimet shoqërore kanë qenë me 13 milionë lekë, ndërsa blerjet e ndryshme arrijnë në vlerën 38 milionë lekë. Sipas tabelës së shpenzimeve të depozituara në Komisionin Qendror të Zgjedhjeve, rezulton se PD ka bërë investime të rëndësishme në blerjen e mobiljeve të reje. Me kalimin në godinë e re te ish-Shtëpia Qendrore e Ushtrisë, demokratët janë detyruar që të shpenzojnë 11 milionë lekë për mobilim dhe orendi të zyrave. Duke qenë një vit elektoral, një tjetër përqendrim i shpenzimeve të demokratëve kanë qenë edhe mjetet motorike për të cilat kanë shpenzuar jo pak, por 15.7 milionë lekë.
PD në “stanjiacion” për anëtarësinë
Numri i anëtarëve të Partisë Demokratike nuk ka ndryshuar gjatë vitit që ne lamë pas. Gjatë dy viteve të fundit, në raportin e firmosur nga Keltis Kruja, raportohet se Partia Demokratike deri në 31 dhjetor të vitit 2013 kishte 102 mijë anëtarë partie. Kjo anëtarësi është e organizuar në 407 seksione të partive në të gjithë vendin dhe 4406 grup seksione, të cilat janë dhe strukturat më të vogla organizative në nivel lokal. Sa i përket anëtarësisë të PD-së, ajo rezulton të jetë gati 3 mijë më pak sesa ajo e PS-së. Aktualisht PD ka nisur procesin e riorganizimit të saj. Mësohet se kryetari Basha u ka kërkuar degëve që të mbyllin deri në fund të shkurtit listën e ripërtërirë të anëtarësisë, përmes një formulari. Por, një nga variantet për t’iu bashkuar Partisë Demokratike, është zgjedhur edhe ajo përmes internetit. Çdo kush që mendon se do t’i bashkohet PD-së, mund të aplikojë në formularin e hedhur online, ndërsa më pas do të mund të kontaktohet nga dega përkatëse për të marrë edhe teserën e selisë. Për të mbarëvajtur të gjithë këtë proces, nga PD janë caktuar 40 koordinatorë.
Pas mbylljes së fazës së parë, PD pritet që të nisë procesin e zgjedhjes së drejtuesve të saj nëpër rrethe, ndërsa ende nuk dihet se kur do të mblidhet Këshilli i saj Drejtues apo Kryesia për të diskutuar vendimmarrjet dhe për të sqaruar nismat. Aktualisht të gjitha udhëzimet kanë dalë direkt nga kryetari i ri i PD-së, ndërsa mbledhjet e vetme janë ato të grupit parlamentar. PD gjendet në vështirësi sa i përket organizimit. Me humbjen e zgjedhjeve të përgjithshme parlamentare, shumë prej ish-deputetëve të cilët nuk u rikandiduan kanë shprehur kritika për mënyrën e qeverisjes së vendit gjatë 8 viteve kur PD ishte në pushtet dhe ndaj udhëheqjes së PD-së. Me ardhjen e Bashës në krye të PD-së, një pjesë e tyre u larguan nga forumet drejtuese, ndërsa u zëvendësuan me shpejtësi me emra të tjerë, kryesisht të njohur si bashkëpunëtorë të kryetarit të ri të PD-së.
