Krahas uljes së tarifave të shërbimit nga komanitë ceulare, një nismë tjetër që do t'u vinte në ndihmë qytetarëve në këtë drejtim është edhe shërbimi i bartjes së numrit.
Ka më shumë se një vit e gjysmë, që konsumatorët shqiptarë privohen nga e drejta e ndërrimit të kompanisë nga e cila merr shërbimin pa ndryshuar numër. Ky shërbim, i bën të mundur qytetarëve që për arsye të ndryshme si, çmimet e favorshme, mbulimi më i gjërë i territorit, shërbimi më i mirë, arsyet familjare, etj., të mund të ndërrojnë kompaninë celulare por pa ndërruar numrin që kanë në përdorim.
Një nga arsyet kryesore që i pengon abonentët të ndërrojnë numrin për momentin është kostoja që do të duhet të paguanin ata për të rivendosur nga e para kontaktet me të njohurit e tyre.
Ofrimi i këti Shërbimi duhet të ishte bërë i mundur që në muajin qershor të vitit 2009. Ligji Për Komunikimet Elektronike në Republikën e Shqipërisë e përcakton qartë kohën në të cilën tre kompanitë celulare në vend duhej te fillonin së ofruari këtë shërbim por në verën e vitit të shkuar çështja mbeti peng e një firme të Këshillit Drejtues të Bordit të AKEP-it.
Referuar kuadrit ligjor, ndryshe nga më parë kur numri ishte në pronësi të shtetit ku ky i fundit ia shiste kompanive celulare dhe këto abonentëve të tyre, tashmë ai konsiderohet vetëm pronë e konsumatorit dhe ai ka të gjitha të drejtat që pa e ndërruar të mund të zgjedhë shërbimin që mendon se është më i leverdisshmi.
Kreu i AKEP-it mori dje përsipër për të bërë të mundur ofrimin e shërbimit të bartjes së numrit ndaj konsumatorëve por nuk bëri të ditur kohën në të cilën do të fillojë aplikimi në terren. Por krahas lehtësive që u ofron konsumatorëve, bartja e numrit shoqërohet me kosto për kompanitë celulare.
Për të ofruar këtë shërbim është e nevojshme ngritja e një dispecerie të përbashkët, ku secila kompani të dërgojë specialistët e saj bashkë me aparaturat e duhura. Në këtë mënyrë do të bëhet e mundur njëkohësimi i veprimeve duke ulur kohëzgjatjen e bartjes së numrit.
Brenda vitit hyn në shërbim teknologja '3G'
TIRANË- Tregu i telekomunikacioneve në vend pritet të ofrojë shërbimin e teknologjisë "3G" brenda këtij viti. Agjencia e Komunikimeve Elektronike dhe Postare raporton se tashmë ka mbaruar studimi për këtë shërbim ndërkohë që pritet ofrimi i këtij shërbimi gjatë muajve në vijim.
Teknologjia '3G' "Gjenerata e Tretë e Telefonisë Celulare" mundëson shkëmbimin e të dhënave me një intensitet më të lartë si foto, video, internet, TV, etj. Por për ofrimin e këtij shërbimi kompanitë duhet të kryejnë investimet të tjera në rrjetin e tyre të shpërndarjes duke montuar apartura që e mundësojnë këtë shërbim. Teknologjia "3G" ka filluar së shërbyeri që në vitin 2000, ndërkohë që tashmë është shtrirë në një serë shtetesh të globit.
Emirjon Senja : Gazeta Shekulli
