Partizani ka kryer dje seancën e fundit stërvitore për këtë sezon futbollistik, përgatitje të cilat janë zhvilluar pasdite në ishkompleksin "Dinamo". 
Trajneri Agostineli ka menduar që seanca të zhvillohej para vendgrumbullimit të ekipit, kështu që dje ekipi i parë ka ndërruar vendin me skuadrat e moshave, të cilat janë spostuar në Kamzë. Përgatitja e fundit është zhvilluar në orarin e ndeshjes dhe kryesisht është punuar në aspektin tekniko-taktik.
Ndonëse është rikthyer, stafi teknik ka menduar që të mos rrezikojë me aktivizimin e Filipe Gomes ndaj Teutës. Kështu që braziliani nuk pritet si titullar në sfidën e sotme. Ndërsa argjentinasi Torasa mendohet të jetë në fushë nga minuta e parë, por nëse nuk e nis si titullar në vend të tij mund të luajë Fazliu ose Bardhi. Risia në takimin e fundit pritet të vijë në mbrojtje, ku me shumë mundësi 18- vjeçari Nertil Hoxhaj do të luajë si mbrojtës i majtë.
Në mungesë të Kalarit, Atandës dhe Trashit, përzgjedhja për këtë pozicion mbetet mes Franc Veliut dhe 18-vjeçarit Hoxhaj. Gjatë pjesës së dytë të sezonit, trajneri Agostineli u ka dhënë mundësi edhe disa lojtarëve të rinj, si Bardhi, Fili dhe Ramadani. Ndoshta nesër është dita që Nertil Hoxhaj të bëjë debutimin me Partizanin në Kategorinë Superiore.
