Ish-kapiteni i përfaqësueses shqiptare, Altin Lala, ka treguar në një intervistë për "wn.de" se si është atmosfera në kampin kuqezi, cilat janë shanset e Shqipërisë për të kaluar turin dhe cili prej futbollistëve që janë grumbulluar me kombëtaren mund të bëhej protagonist në Bundesligë.
Sa e lartë është euforia në vendlindje pas kualifikimit të parë të Shqipërisë në një turne madhor?
Euforia është e lartë. Të gjithë shqiptarët kudo që jetojnë, edhe ata në SHBA, janë të entuziazmuar. Edhe unë jam kurioz. Të gjithë shqiptarët do të jenë para televizorit për të parë ndeshjet.
Sa shanse mendoni se kemi për të kaluar grupin?
Ne nuk duam thjesht të jemi këtu, por edhe të shfrytëzojmë momentin. Shumë gjëra mund të ndodhin, për faktin se edhe skuadra e tretë në grup mund të kalojë. Duhet të mundohemi që të marrim diçka që në ndeshjen e parë kundër Zvicrës. Kjo është e mundur. Jemi jofavoritë. Megjithatë e kemi një shans të vogël. Na duhet vetëm të fitojmë një ndeshje. Shpresoj që të ndodhë.
Si luan Shqipëria?
Ne luajmë lojë shumë kompakte, pasi trajneri është italian. Është e vështirë të na shënosh gol. Kemi pasur probleme në sulm, unë shpresoj që sulmuesit t'i kenë ruajtur golat për Europianin. Nëse ne arrijmë të shënojmë nga një gol në secilën ndeshje, jam i bindur se do të kualifikohemi për fazën me eliminim direkt, pasi me siguri që do të arrijmë të mbrohemi mirë.
Cili lojtar duhet parë me vëmendje?
Ne kemi një lojtar si Elseid Hysaj i cili luan te Napoli. Atë e kërkojnë shumë klube. Milot Rashica është një talent i madh dhe ka një karrierë të madhe përpara, por nuk u grumbullua. Por është edhe Taulant Xhaka, vëllai i Granit Xhakës , mund të luajë pa probleme në Bundesligë. Ai është luftarak, dhe vrapon gjithë kohën.
Kush do ta fitojë Europianin?
Pyetje e mirë. Gjermania si Kampione Bote është padyshim favorite, por ka edhe skuadra të tjera. Ndoshta e kemi harruar pak Spanjën, por Spanja është e fortë. Italinë duhet ta llogarisësh gjithmonë. Të shohim edhe çfarë kanë për të treguar britanikët, ata kanë një ekip të mirë.
