Arlind Ajeti ka firmosur zyrtarisht kontratën me Torinon, ndonëse klubi Italian nuk e ka bërë publike një fakt të tillë. Nga burime pranë stafit që menaxhon futbollistin, mediat italiane kanë arritur të sigurojnë foto nga momenti i firmës me klubin italian.
Ajeti zhvilloi vizitat mjekësore që në orët e para të mëngjesit të së enjtes në klinikën "Medicina Dello Sport", duke i kaluar të gjitha me sukses, ndërsa më pas, takoi drejtuesit e klubit të Torinos të cilët kishin insistuar për blerjen e tij.
Atë e priste mënjëherë gati edhe kontrata e tij me Torinon, e negociuar një ditë më parë nga përfaqësuesit e lojtarit. Ajo do të jetë trevjeçare, me të drejtën e zgjatjes edhe për dy vite të tjera. Nga kjo kontratë, Ajeti do të përfitojë rreth 500 mijë euro në sezon.
Ndërkaq, është lënë të kuptohet se mbrojtësi i përfaqësueses shqiptare ka shprehur preferencën që të vazhdojë të mbajë fanellën me numrin 93, që përfaqëson vitin e tij të lindjes, duke shpresuar që t'i sillte fat si te Frozinone ku u bë një lojtar i njohur në futbollin italian.
