Pablo Armero, mbrojtësi i Kolumbisë, ka përfunduar pas hekurave. Futbollisti është arrestuar nga policia në hotelin ku po qëndronte në Majami, pasi po dhunonte partneren, pak orë pas fitores së kombëtares së tij ndaj Haitit.
Sipas informacioneve paraprake të policisë, nga hoteli kishin ardhur sinjalizime për zhurmat e çuditshme që vinin nga dhoma e Armeros. Forcat e rendit kanë ndërhyrë për të kuptuar se çfarë po ndodhte dhe kur kanë shpërthyer derën, kanë gjetur partneren e Armeros duke qarë dhe me flokët e prera. Armero, i marrë në pyetje nga policia, kishte shpjeguar se kishte shkuar në lokal për të pirë me të dashurën e tij, dhe pasi ishte kthyer në dhomë, kishte pranuar kërkesën e saj që t'i priste flokët.
Krejtësisht ndryshe ishte versioni i partneres së mbrojtësit. Sipas saj, Armero kishte kërkuar të kryenin marrëdhënie seksuale, por ajo kishte refuzuar se ishte e lodhur. Në këtë pikë, kishte filluar çmenduria, pasi Armero ishte inatosur dhe e kishte dhunuar. Ajo pretendon se fillimisht ai i ka hequr me forcë një zinxhir nga qafa, e më pas filloi t'i priste flokët me një brisk.
Tani mbetet në dorën e policisë të vërtetojë se cili është versioni zyrtar i kësaj ngjarjeje shumë të çuditshme.
