BE Rusia dhe Ukraina rifillojne negociatat per gazin

Ukraina, Rusia dhe Bashkimi Evropian do të marrin pjesë më 21 tetor në negociatat që do të zhvillohen në Berlin, për parashikimin e zgjidhjes së mosmarrëveshjeve për gazin, para stinës së dimrit.

Bashkimi Evropian i propozoi dje Ukrainës dhe Rusisë organizimin e një takimi më 21 tetor në Berlin, ndërsa ministria Ruse e Energjisë njoftoi pranimin e datës për bisedimet tripalëshe.

“Pala ruse ka pranuar datën për zhvillimin e negociatave tripalëshe që parashikojnë të garantojnë sigurinë e tranzitit nëpërmjet territorit ukrainas nën formatin Rusi-Ukrainë-BE. Raundi i ri i negociatave do të zhvillohet më 21 tetor në Berlin”, theksoi Ministria ruse e Energjisë në një komunkatë.

Ndërsa kryeministri rus, Dmitry Medvedev, gjatë një takimi me ministrin e Energjisë në vend, Aleksander Novak deklaroi se Moska duhet të vijojë kërkimin e një kompromisi për furnizimin me gaz të Kievit. Dy politikanët ranëm dakord se rifillimi i furnizimit të Ukrainës me gaz mbetet thelbësor, raporton "RT".

“Kushtet e Ukrainës duhet të jenë të pranueshme dhe ky është synimi në takimin me Komisionin Europian”, deklaroi Medvedev, duke e nxitur ministrin e Energjisë që të rifillojë bisedimet me Ukrainën. Ndërsa Novak tha se u diskutua edhe agjenda e ristrukturimit të borxhit deri në fund të vitit.

Rusia, Ukraina dhe BE-ja nisën negociatat 3-vjeçare në Berlin në shtator, ku diskutuan “planin e dimrit”. Plani përfshin vendimin që Ukraina t’i paguajë “Gazprom-it” 2 milardë dollarë, si pjesë e borxhit të gazit, deri në fund të tetorit dhe një shtesë prej 1.1 miliardë dollarësh deri në fund të vitit për sasinë prej 5 miliardë kubikësh gaz. Megjithatë, dokumentet finale nuk janë firmosur ende dhe agjenda e pagesës mbetet ende e bllokuar.