TIRANË, 19 Tetor /ATSH/ Kryetari i Partisë Demokratike, Lulzim Basha, nga Lezha e Besëlidhjes së Skënderbeut, ka ftuar qytetarët të bëhemi bashkë pa asnjë dallim kundër të keqes, ta flakim të keqen, të përqafojmë të mirën e të ecim përpara.
Kryetari i PD-së Basha u shpreh se "iu bashkua përkujtimit të shqiptares së madhe Nënë Tereza në 12 vjetorin e Lumturimit të saj organizuar nga Bashkia Lezhë. Kjo është një ditë ku shumë prej nesh në Lezhë dhe anembanë Shqipërisë qe te mendohemi e te reflektojmë për ditët e vështira që janë ulur këmbëkryq në mijëra vatra familjare shqiptare. Shqiptarja e madhe që u nderua me çmimin Nobel për Paqen u ka dhënë një shembull të madh, jo vetëm të krishterëve anembanë botës, jo vetëm shqiptarëve, por gjithë civilizimit, shembullin se me forcën e shpirtit nuk ka gjë që nuk tejkalohet".
Basha theksoi se "duhet të bëhemi bashkë pa asnjë dallim, kundër të keqes, ta flakim të keqen, të përqafojmë të mirën e të ecim përpara! Ky është reflektimi që më ndrin sot në shpirt teksa emocionohem dhe gëzohem në këtë përkujtim të të bekuarës Nënë Terezë!", ka përfunduar Basha. /a.ke/
