Cmenduria shqiptare me doktoraturat

Nuk ndodh në asnjë Universitet të rajonit dhe as Europës. Çdo vit nga shkollat tona të larta dalin 1500 doktorë shkencash. Të paktë janë ata që synojnë shkencën e mirëfilltë sepse për pjesën më të madhe diploma e doktoraturës është një mundësi punësimi. Ky mentalitet i krijuar prej vitesh reflektohet edhe tek studentet e sotëm.

Të gjithë duan doktoraturën, por asnjë nga të intervistuarit nuk do dhe nuk mundet të merret me shkencë. Drejtues të shkollave të larta me keqardhje tregojnë se ashtu si në ciklet e tjera të studimit edhe doktoraturat po shkojnë drejt zhvlerësimit. Krahas studenteve që synojnë doktoraturën si mundësi punësimi, vitet e fundit tundimit për një diplomë apo titull “Doktor Shkencash” nuk i kane rezistuar politikanët dhe zyrtarët e lartë edhe pse shumë prej tyre nuk kanë lidhje me arsimin e aq më pak me shkencën.

Sot titulli “Doktor Shkencash”, nëse punon në administratë, të siguron një rritje page prej 20 mijë lekësh të rinj. Për të frenuar ketë bum “shkencëtaresh” që del çdo vit nga Universitete tona dhe me një kosto prej 300 mijë dollarësh për buxhetin e shtetit, Ministria e Arsimit po shikon mundësinë e një kontrolli më të rreptë mbi këtë shkollë studimi. Ndërkohë qeveria ka bllokuar kuotat e pranimeve për doktoraturë ndoshta deri publikimin e politikes së re të Ministres së Arsimit.