UPDATE/ Humbja me Francën la shije të hidhur te kuqezinjtë pas dy golave të realizuara në minutat shtesë, por loja e treguar në fushë meriton të vlerësohet sipas trajnerit të Kombëtares.
Në një prononcim për mediat pas ndeshjes me Francën, De Biazi deklaroi se futbollistët dhanë maksimumin në fushë dhe në fund tifozët duartrokitën ekipin.
"Bëmë një lojë shumë të mirë, por që në fund humbëm. Lojtarët janë me moralin poshtë, por u thashë që të mos e lëshojnë veten",-tha ai.
"Pashë entuziazmin e lojtarëve kundërshtarë kur bënë gol, sepse edhe ata nuk e besonin. Këtë natë, ne vendosëm në fushë gjithçka që mundëm dhe kishim. Në pjesën e dytë e kishim mundësinë dhe mendoj së meritonim më shumë. Në dhomat u thashë lojtarëve se bëmë ç'mundëm dhe nuk ka pse të mërzitemi.
"Është mëkat. Mendoj se skuadra rezistoi deri në fund, por nuk bëri vetëm lojë në mbrojtje, pasi në pjesën e parë dhe fillimin e të dytës rastet më të mira i kishim ne. Fatkeqësisht në futboll, nëse nuk shënon, nuk merr rezultate të rëndësishme. Ne kemi parë skuadrën që vuri në vështirësi Francën dhe pësuam gol praktikisht një minutë para fundit",-tha De Biazi.
Sipas tij, problemi fizik i Ajetit kishte penalizuar ndjeshëm ekipin pasi e kishte detyruar të ndryshonte planin e ndërrimeve. "Ajeti bëri një ndeshje të mirë, një lojtar i cili sipas meje, te ne mund të ketë një të ardhme me rëndësi të madhe, pasi ka shumë cilësi. Më vjen keq që nuk ka pasur një vit impenjativ, arsye se pse nuk mund të përballojë 90 minuta të plota. Ndaj u detyrova ta ndërroja. Desha të fusja një sulmues, por nuk mund ta bëja", shpjegoi ai.
"Kur hyra në dhomat e zhveshjes gjeta një ekip të zhgënjyer, të gjithë me kokën e ulur. Por u thashë të ishin krenarë se kishin bërë një ndeshje të mirë me Francën. Mendoj se skuadra ime ka bërë Francën të vuante", theksoi ai gjatë konferencës për shtyp.
De Biazi vazhdon të besojë se ekipi mund të kualifikohet në turin tjetër, nëse do të arrijë të shënojë ndaj Rumanisë. "Mendoj se po, nëse mund të bëjmë golat që nuk bëmë kundër Zvicrës dhe Francës, mund të mundohemi të marrim këto tre pikë që mund të na mundësojnë kalimin në fazën tjetër. Ajo që mund të them është se skuadra erdhi këtu pasi tregoi se është një skuadër e vërtetë dhe mund të luajë futboll të mirë".
Në fund, nuk munguan elozhet për tifozët. "Tifozët tanë janë special, pasi shumë prej tyre jetojnë jashtë, në Zvicër, Gjermani, Francë, Itali. Kur u jepet mundësia të na ndjekin, vijnë të shumtë . Po, janë zhurmaxhinjtë më të mëdhenj, por janë paqësorë, më të mirët. Janë të lumtur kur fitojmë, sigurisht më pak kur humbim. Më pëlqeu që kur skuadra sot shkoi pranë tyre, ata duartrokitën".
