Valentino Rosi është rikthyer si pretendent në garën për titullin kampion të Moto GP. Pas braktisjes së garës së shkuar për shkak të një problemi me motorin e tij, Rosi triumfoi në Çmimin e Madh të Katalonjës, duke zhvilluar një garë perfekte në pistën ku dy ditë më parë humbi jetën piloti i Moto 2, Luis Salom.
Lorenco ishte i pari pas një nisjeje perfekte me Markez dhe Ianone që u vunë në ndjekje të tij, ndërsa Rosi ishte i 8-ti. Por këto pozicione zgjatën vetëm pak xhiro. Rosi u ngjit shumë shpejt në krye, duke nisur një duel të gjatë me Markez, pasi Lorenco nuk po arrinte të mbante ritmin e më të shpejtëve. Në xhiron e 7, ai u nxor jashtë piste nga Ianone i cili gaboi parakalimin, duke rrëzuar spanjollin dhe duke e larguar nga gara.
Më pas, Rosi i rezistoi sulmeve të Markez, për të marrë një sukses të rëndësishëm në pistën e shtëpisë për spanjollët.
Në podium, Rosi u shfaq me një bluzë të zezë në shenjë nderimi për Salom. Megjithatë, në fund ai festoi rihapjen e luftës për titullin kampion. Botërori tashmë kryesohet nga Markez me 125 pikë, i ndjekur nga Lorenco me 115 pikë dhe Rosi me 103.
