Plani i Donis Avdijajt për të fituar hapësira në radhët e Shalkes ka marrë një goditje shumë të rëndë. Sulmuesi 19 vjeçar ka pësuar një dëmtim në meniskun e gjurit të djathtë dhe ka lënë në mes turneun në Kinë me skuadrën e Shalkes, për t'u kthyer në Mynih, ku do t'i nënshtrohet vizitave më të specializuara.
"Kicker" raporton se gjatë seancës stërvitore të paradites në Kinë, Avdijaj ka pësuar një dëmtim të rëndë, shkalla e të cilit nuk është përcaktuar ende. Por gjithsesi Avdijaj e ka mbyllur turneun kinez, pasi drejtori sportiv i Shalkes, Kristian Heidel, ka shpjeguar për gazetën gjermane se ai "nuk mund të stërvitet më këtu me ne".
Klubi ka organizuar menjëherë udhëtimin e lojtarit, i cili do të mbërrijë nesër në Mynih dhe do të shkojë në një klinikë të specializuar për të parë shkallën e dëmtimit.
Pas huazimit të suksesshëm te Shturm Grac, sulmuesi 19 vjeçar shpresonte që të siguronte hapësira te Shalke, por dëmtimi ka vënë edhe një herë në dyshim qëndrimin e tij te klubi gjerman, pasi koha e riaftësimit mund ta lërë për një periudhë të gjatë jashtë fushave të lojës.
Donis Avdijaj kishte deklaruar se ishte i gatshëm të luante për Shqipërinë në të ardhmen dhe pritej që ai të merrte një ftesë nga trajneri De Biazi gjatë miqësoreve të radhës pas eliminatoreve të Botërorit 2018.
