Klodian Duro ka përgëzuar skuadrën për lojën e zhvilluar ndaj Laçit.
Pavarësisht barazimit, trajneri i Kukësit është shprehur i kënaqur me lojën e zhvilluar ndaj kurbinasve.
"Nuk jam i zhgënjyer por nuk kishim fat pasi pësuam gol në minutat shtesë. Duhet të shohim përpara me kokën lart, kemi dhe dy javë para dhe besoj që do të jemi në vendin e tretë aty ku jemi. Futbollistët e interpretuan mjaft mirë ndeshjen, dhanë aq sa duhet. Të vjen keq për një episod momental të ndeshjes, të barazohesh në minuta shtesë".
Finalja e Kupës
"Jam shumë i kënaqur nga ndeshja që zhvilluam sot, nuk është e lehtë të luash çdo tre ditë dhe të arrish rezultate pozitive. Në finale mendoj që nuk duhet të vendosim në presion kolegjiumin e arbitrave shqiptarë. Presioni i kampionatit dhe objektivave të ekipeve është i madh dhe nuk duhet të bie mbi ta. Dy futbollistë të Laçit sot mendoj që duhej të ishin jashtë fushës së lojës me karton të kuq. Ekipi duhet të përmirësohet në finale, me këtë tension dhe goditjet që pësuan lojtarët e mi sot, ato duhet të përgatiten mirë për ndeshjen e Kupës. Mendoj që ato sot meritonin plotësisht fitoren. Gjithsesi në fund do të marrin atë çfarë meritojnë. Deri atëherë duhet të përqendrohemi te dy ndeshjet e mbetura, për të siguruar vendin e tretë dhe më pas të ngremë trofeun e Kupës së Shqipërisë".
Europa
"Asgjë s'ka mbaruar, pasi ende kemi dy ndeshje për të luajtur. Teuta ka tre ndeshje në dispozicion sepse tani luan pas nesh. Asgjë nuk është e lehtë për ekipet që synojnë të fitojnë për të arritur objektivin. Besoj se në fund ne do të jemi në vend të tretë dhe do ngremë gjithashtu Kupën e Shqipërisë.
