Elbasani mund 3-2 Lushnjën në "Roza Haxhiu" në një ndeshje që do të mbetet në memorie vetëm për nevojën e tri pikëve që kishte skuadra verdheblu për t'iu larguar fundit. 
Pesë gola dhe shifra të përmbysura nga 2-0 për vendësit në 3-2 për miqtë, u përcollën me një qetësi olimpike në stadiumin "Roza Haxhiu", ku munguan qartësisht emocionet dhe entuziazmi për golat e shënuar, pasi të pranishëm ishin rreth 100 tifozë.
Ndeshja nis mjaft mirë për të zotët e shtëpisë, që luajnë në gjysmë- fushën e miqve dhe skuadra verdhejeshile gjen me meritë avantazhin në minutën e 14-të. Bakiasi kroson nga e djathta, Allkanjari e prek pak topin me kokë dhe Mezini nga prapa devijon saktësisht me kokë në rrjetën e Mystaragos, 1-0 për Lushnjën. Epërsia e lushnjarëve vazhdon edhe me anë të një kundërsulmi, ku sërish Bakiasi shërben për kapitenin Taullau, që fiton një duel shpejtësie me Suvarinë dhe përballë Myftaragos rrëshqet topin në rrjetë, 2-0 për lushnjarët. Pas këtij rezultati, ritmi i të besuarve të trajnerit Bano bie dhe Elbasani në alarm për rezultatin lëviz më shumë. Rezultati ngushtohet menjëherë nga Toçi, i cili në minutën e 37-të shënon golin e parë për miqtë. Në fund të pjesës së parë, Abazaj, i cili ishte i lirë në të majtë të sulmit, merr bukur topin me gjoks duke goditur më pas me shumë saktësi përballë Haremit dhe 2-2.
Me Elbasanin që për 10 minuta barazon shifrat, skuadrat shkojnë në pushim. Në pjesën e dytë skuadra verdheblu është më superiore dhe luan më shumë në gjysmëfushën e Lushnjës. Në minutën e 71-të, Toçi nga e majta pason për Abazajn në qendër, që devijon me saktësi në rrjetë dhe 2-3 për verdheblutë. Elbasani pas golit fiton qetësinë dhe ruan avantazhin deri në fund duke marrë fitoren e kërkuar në "Roza Haxhiu", fitore e cila e mban në vendin e tetë me 19 pikë.
LUSHNJA-ELBASANI 2-3
GOLAT: Mezini 14´, Taullau 34´ / Toçi 37´, Abazaj 44´, 72´
LUSHNJA: Haremi, Shurdhi(Ruço 68´), M.Sula, S.Çela, Hasalla, E.Bakiasi, Taullau(Alushi 46´), Gjoni, Mezini(Gjyla 68´), Dervishi, Allkanjari. Trajner: A.Bano
ELBASANI: Myftarago, Duka, J.Dosti, Suvaria, Kaçuli, Kasa, Toçi, Abazaj, Vllahi(Beqiri 81´), Bualli(L.Bërdufi 76´), Luta(Tafani 59´). Trajner: M.Dosti
GJYQTARË: O. Yzeiraj, E. Pashaj, E. Begaj(Patos)
DELEGAT: E. Hyka(Tiranë);
VËZHGUES: Sh. Havari(Vlorë)
Përgatiti: Alban Alushi
