Do të luhet sot akti i parë final i "play off"-it në basketboll për femra mes kampioneve në fuqi dhe Goga Basket. Përballë vlonjateve që dominojnë prej gati një dekade do të jenë debutueset durrsake. 
Në prag të finales një nga titullaret e padiskutuara, Elektra Zykaj, shprehet për "Panorama Sport" se objektivi i Flamurtarit është gjithmonë i njëjti, pra të rrëmbejë çdo trofe të mundshëm. Si në rang ekipor dhe atë individual, Zykaj e cilëson të suksesshëm sezonin që është në prag epilogu.
"Humbja ndaj Goga Basket nuk kishte efekt, pasi në renditje kemi qenë të shkëputura nga vendi i dytë. Tashmë, ne vijmë pas ndeshjeve shumë të mira me Vllazninë dhe shumë të motivuara. I gjithë grupi është u përkushtuar stërvitjeve që kemi pasur dhe nuk i druhemi kundërshtarit. Si çdo finale që ka emocionet dhe rëndësinë e vet, duhet të kemi kujdesin më të madh që të mos gabojmë dhe e di shumë mirë që çdo gjë do të shkojë ashtu siç duam.
Ky sezon ka qenë i suksesshëm për ne sepse e kemi mbyllur të parët në klasifikim të shkëputur nga vendi i dytë në krahasim me sezonin e kaluar që ishim të dytët dhe na u desh të përballeshim me një skuadër shumë të mirë siç ishte Tirana, por që kuptohet e mbyllëm me sukses", u shpreh fillimisht Zykaj, një nga protagonistet e vlonjateve. Mes të tjerash, ajo e merr me sportivitet edhe humbjen në finalen e Superkupës.
"Për sa i përket Superkupës, dua të them që për ne ka qenë ndeshja më e dobët e jona. Por ka ditë të tilla në sport, pra ndodh edhe kështu. Luhatjet janë të pranuara në sport, edhe pse ndoshta mund të jesh i dehur nga sukseset. Por ne i kemi vlerë- suar maksimalisht ndeshjet, të cilat i kemi konsideruar si të forta.
Objektivi i Flamurtarit është gjithmonë i njëjtë, të rrëmbejë çdo trofe që i del përpara. Ne nuk punojmë me shifra dhe përqindje, ne futemi në fushë për të fituar. Ekipit kundërshtar nuk i japim asnjë përqindje shans për fitore. Ky është mentaliteti jonë dhe kështu futemi në fushë. Ne e vlerësojmë ekipin kundërshtar, por që kupa mbetet përsëri në Vlorë", u shpreh për gazetën basketbollistja Zykaj.
NDESHJA E PARË, SOT
Flamurtari-Goga Basket 18:00
NDESHJA E DYTË, 24 MAJ
Goga Basket-Flamurtari 18:00
NDESHJA E TRETË, 27 MAJ
Flamurtari-Goga Basket 18:00
NDESHJA E KATËRT, 31 MAJ
Goga Basket-Flamurtari 18:00
(nëse do të jetë e nevojshme)
NDESHJA E PESTË, 3 QERSHOR
Flamurtari-Goga Basket 18:00
(nëse do të jetë e nevojshme)
