Franc Veliu në "orbitën" e Tiranës. Mbrojtësi pritet që sot të zhvillojë një takim me drejtuesit bardheblu. Burime të sigurta pranë lojtarit konfirmojnë për gazetën se ai do të jetë në kryeqytet për të folur me 24 herë kampionët e vendit. Vlonjati, i cili e mbylli sezonin te Partizani, aktualisht është pa kontratë dhe kjo i jep mundësinë që konform rregullave të nisë negociatat me një tjetër klub.
Kujtojmë që nuk është e para herë që emri i mbrojtësit të majtë lakohet në merkaton e Tiranës, megjithatë gjatë karrierës së tij vlonjati nuk ka luajtur kurrë për këto ngjyra. Sakaq, në planet e kryeqytetasve deri më tani janë dy "ish" të Flamurtarit, Ilion Lika dhe Bedri Greca. Me të parin është mbyllur gjithçka, por pritet vetëm firma, kurse me të dytin vijojnë bisedimet. Por jo vetëm, pasi vëmendja është përqendruar edhe në Afrikë e Portugali.
Huazimet
Merkatoja e Tiranës do të nisë për Europën. Edhe pse konfirmimi nga ana e UEFA-s mungon, në klub duan të jenë gati. Sytë i kanë te Skënderbeu. Dhe burime për gazetën zbulojnë se drejtues të bardhebluve kanë telefonuar Ardjan Takajn, duke i kërkuar bashkëpunim. Vendimi i takon pa dyshim presidentit të korçarëve, nëse do të japë OK-in për të ndihmuar Tiranën për Europën, duke i dhënë "hua" ndonjë lojtar. Dhe bardheblutë preferojnë Lilajn, Vangjelin dhe Salihin.
Stërvitja
Tirana zyrtarisht do të nisë sot punën për Ligën e Europës. Ashtu sikundër ishte menduar, e mërkura është dita kur do të startojnë përgatitjet. Stafi teknik ka programuar dy seanca, teksa e para do të kryhet në palestër, në orën 09:00. Pritet që grupi të jetë i plotë, por pa përfshirë ata që janë pa kontratë, si Kërçiku apo Fukui. Klubi paralajmëron rishikime kontratash. Edhe ata futbollistë që kanë marrëveshje për këtë vit, pritet që të ulen me drejtuesit për të riparë kontratën e firmosur më herët. Gjasat janë që të ketë ulje rrogash, ose e thënë ndryshe, në çdo kontratë mund të përfshihen edhe klauzola, të cilat lidhen me performancën.
Adela Merko
