UPDATE/ Franca dhe Shqipëria përballen mbrëmjen e së mërkurës (21:00) në kuadrë të takimeve të dyta finaliste për "Euro 2016" në Grupin A.
20:30
Të dyja ekipet kanë dalë në nxehje. Kjo do të jetë ndeshja e parë që prej 3 vjetësh që Lorik Cana nuk do të jetë në fushë. Cana ka luajtur si titullar për 13 ndeshjet e zhvilluara të kombëtares gjatë 3 viteve.
20:00
Një orë para fillimit të ndeshjes, dy trajnerët respektiv Deshamp dhe De Biazi zbuluan formacionet e tyre për këtë sfidë. Për Francën, Grizman dhe Pogba do të jenë "spektatorë" prej stolit, e njëjta gjë edhe për Xhakën dhe Canën në kampin kuqezi.
Cana mungon pas kartonit të kuq që mori në sfidën me Zvicrën. Ndërkohë, hera e fundit që Deshamp ka lënë në stol Grizmanin dhe Pogban ka qenë me Anglinë, ndeshje që ka përfunduar me humbje për "gjelat".
19:30
Kombëtarja Shqiptare ka mbërritur në "Velodrome". Lojtarët dhe stafi përshëndesin tifozët e shumtë. Kombëtarja Franceze ka mbërritur 10 minuta më para.
Pak orë para fillimit të sfidës, kuqezinjtë zunë vendet e para në stadiumin "Valedrome" të Marsejës.
19:00
Shumë fansa janë futur në stadium edhe pse ndeshja ende do 2 orë të fillojë. Kushtet e motit janë përkeqësuar disi dhe shpejtësia e erës ka filluar të rritet.
18:25
Janë hapur dyert e stadiumit "Velodrome" ku Shqipëria dhe Franca sot në mbrëmje do të luajnë ndeshjen e tyre të dytë të "Euro 2016". Tifozët kanë filluar të hynë në stadium dhe nuk raportohen incidente.
Foto / Francë-Shqipëri, luhet më parë në "fan-zonë"
15:30
Tifozeria shqiptare po kthehet gjithnjë e më shumë ndër më të vlerësuarat e Euro 2016, duke marrë elozhe të shumta për sjelljen model dhe për dashamirësinë që ka shfaqur ndaj tifozerive të tjera.
Shembulli konkret gjatë ditës së sotme ishte edhe një ndeshje futbolli e improvizuar mes tifozëve të Francës dhe atyre të Shqipërisë në "fan-zonën" e Marsejës, në një atmosferë me të vërtetë shumë miqësore.
Në mediat franceze, kjo cilësohet si diçka e rrallë, duke marrë për shkas sjelljet e turpshme të tifozerisë angleze dhe ruse pak ditë më parë në të njëjtin qytet.
