Presidenti i Kukësit, Safet Gjici, duket se është zbutur disi. Pas barazimit në ndeshjen e parë që skuadra e tij mori ndaj malazezëve të Rudar Pljevlja, numri një i verilindorëve doli në një deklaratë të fortë publike, ku kritikoi ashpër disa lojtarë të skuadrës së tij, madje paralajmëroi edhe largime. Ai gjithashtu bëri një mbledhje me drejtuesit, duke u kërkuar llogari për paraqitjen e skuadrës dhe marrjen e masave për ndeshjen e kthimit që do të luhet të enjten në transfertë.
Megjithatë, presidenti ka kthyer pllakën dhe dje ka vendosur një premio të çmendur për ekipin në rast fitoreje dhe kualifikimi. Burime të sigurta brenda klubit konfirmojnë për "Panorama Sport" se drejtuesi i Kukësit ka bërë gati 70 mijë euro për futbollistët e tij. Një lajm i tillë pritet t'i jepet skuadrës nga vetë Gjici një ditë para ndeshjes me Rudarin.
Me këtë veprim, ai synon që të shuajë të gjithë zërat në lidhje me aludimet që po bëhen ditët e fundit për largime të mundshme të lojtarëve në drejtim të ekipeve të tjera, për shkak se nuk u plotësohen kërkesat financiare te verilindorët. Me këtë lëvizje, Gjici po ashtu ka konfirmuar se mund të marrë në ekip lojtarët që dëshiron, pasi financat nuk janë aspak problem.
Bisedimet
Deri më tani, skuadra e Kukësit ka qenë një ndër më aktivet në merkato, pasi ka bërë pjesë të sajën 9 futbollistë që kanë ardhur nga brenda dhe jashtë vendit. Megjithatë, një problem më vete janë rinovimet e disa prej titullarëve, që kërkohen nga disa ekipe të tjera të Superiores. Drejtori Dervishi ka deklaruar pak ditë më parë se asnjë nga titullarët nuk do të largohet, por deri në momentin që do të hidhen firmat mbi kontratë, mund të aludohet.
Me një çështje të tillë drejtuesit do të merren menjëherë pas ndeshjes me Rudarin, ku synohet dhe kualifikimi për në turin tjetër. Gjithashtu klubi ka vazhduar bisedimet edhe me disa lojtarë të tjerë, të cilët shihen si përforcime të mundshme për sezonin e ardhshëm futbollistik.
