Gjykata e Tiranës shpalli të pafajshëm kryetarin e Bashkisë së Vlorës Shpëtim Gjika. Vendimi u dha mesditën e sotme dhe u prit me duartrokitje në sallën e gjyqit, ndërsa Prokuroria pritet të apelojë.
Ajo kishte kërkuar dënimin me 4 vjet heqje lirie për kryebashkiakun dhe 3 vjet heqje të së drejtës për të ushtruar funksione publike, pasi akuzohej për shpërdorim detyre dhe falsifikim dokumentesh.
Kreu i Bashkisë së Vlorës, akuzohej për firmosjen e lejeve të ndërtimit për dy godina, njëra në lagjen “Pavarësia” dhe tjetra në bulevardin Vlorë-Skelë, pa i kaluar në Këshillin e Rregullimit të Territorit të Bashkisë.
Gjika në seancat e mëparshme gjyqësore, kishte kërkuar pafajësi me argumentin se e ka ushtruar detyrën në përputhje me ligjin, në krye të Bashkisë së Vlorës.
Mes të akuzuarve të tjerë në këtë çështje ishte edhe Eleni Dardha, punonjëse në Drejtorinë e Planifikimit të Territorit në Bashkinë e Vlorës, e cila u shpall e pafajshme.
Gjithashtu, të akuzuarit e tjerë që u shpallën të pafajshëm janë: Gentian Sherifaj, përfaqësues i firmës që ka kryer punimet e ndërtimit në një prej godinave; Blerdi Liçaj, përfaqësues ligjor i firmës, “DECO System”; Gëzim Feta, pronar i truallit ku është ndërtuar një nga dy godinat që janë nën hetimin e prokurorisë.
Gjykata e Tiranës vendosi heqjen e masës së sekuestros për dy pallatet. Gjykatësi Arben Micko dha pafajësi edhe për 3 të pandehurit e tjerë, Mustafa Tartari, Artan Ferati, Aleks Ahmataj, pronarë të truallit ku është ngritur ndërtesa tjetër (ende e papërfunduar), në vendin e emërtuar “Tre racat”.
