Trajneri Pep Guardiola ka vlerësuar në maksimum lojtarët dhe konkurrentin e tij, Dortmundin.
Pas fitores së titullit, spanjolli bën bilancin e tre viteve si dhe ia dedikon Hajnkesit titullin e tretë.
Guardiola, urime për titullin! Ndiheni i çliruar pas kësaj fitoreje?
Komplimente ekstra për kolegët e mi. Komplimenti i dytë i shkon komplet klubit dhe tifozëve. Dhe e treta për lojtarët e mi të shkëlqyer, për të gjithë ata që luajtën më shumë dhe më pak minuta. Të gjithë kanë qenë pjesë e këtij suksesi. Patjetër që ndihemi të çliruar, pasi më në fund kurorëzuam punën e gjithë vitit. Më falni, sepse harrova Matias Zamerin. Ai më ka qëndruar afër dhe më ka ndihmuar gjithmonë. E kam ndier mungesën e tij. Ky ka qenë titulli më i vështirë në këto tre vite.
Dy vitet e para fituat më herët. Ndoshta këtë herë patët një rival direkt më efikas dhe agresiv?
Natyrisht e përgëzoj dhe komplimentoj Dortmundin. Ata kanë zhvilluar një sezon të shkëlqyer. Dortmundi ka qenë një rival shumë i fortë për ne këtë sezon dhe na pret një finale e madhe në Berlin.
Kujt ia dedikoni titullin tuaj të tretë?
Këtë titull dua t'ia dedikoj Jup Hajnkesit. Jup, ky titull është për ty! Unë kam mësuar shumë prej tij. Ka shumë legjenda te Bajerni, por për mua Hajnkes është një ikonë e veçantë. E falënderoj pa masë për gjithçka! Ne kemi arritur rezultate historike. Të fitosh titullin për herë të katërt radhazi deri dje ka qenë e pamundur. Jam krenar dhe i nderuar që bashkë me Hajnkesin ia arritëm me këtë trupë të jashtëzakonshme.
Mendoni se tani misioni juaj ka përfunduar me sukses edhe pa fitoren e Champions-it?
Ka qenë e pamundur të arrij sukseset e Hajnkesit. Personalisht, u jam mirënjohës klubit dhe lojtarëve. Unë kam dhënë më të mirën nga vetja për të ndihmuar skuadrën. Secili mund ta vlerësojë ndryshe suksesin tim, por personalisht jam i kënaqur. Tre vite nuk kanë qenë perfekte, por rezultative. Kemi ende edhe një finale dhe mezi po pres dushin me birra dhe festën madhështore të Bajernit.
Përgatiti: ENIAR IBRO
