Hapen masterat tarifat dhe kriteret ne cdo dege

Hapen regjistrimet për ciklin e dytë të studimeve Master Profesional dhe Master Shkencor. Sipas udhëzimit të Ministrisë së Arsimit, i cili është firmosur në datën 20 tetor 2014, përcaktohet se po në këtë datë, pra ditën e hënë, më 20 tetor, deri në datën 29 tetor, duke filluar nga ora 08:00 deri në orën 16:00, kandidatët mund të bëjnë aplikimin për t’u bërë pjesë e garës për të fituar të drejtën e studimit në master. Përzgjedhja e fituesve do të bëhet nga komisionet e posaçme që do të bëjnë vlerësimin e dosjeve të kandidatëve.

Për këtë vit qeveria miratoi 12640 kuota të reja për ciklin e dytë të studimeve, pa përfshirë kuotat për shtetasit e huaj dhe transferimet e studimeve, pasi me kuotat për këto kategori, kuotat shkojnë mbi 13 mijë. Kuotat e përgjithshme të pranimit në programet e studimeve të ciklit të dytë me kohë të plotë, “Master Profesional”, janë 6 393, ndërsa “Master i Shkencave” dhe “Master i Arteve të Bukura” janë 6547. Bashkëngjitur, të interesuarit kanë edhe tabelat e shpërndarjes së kuotave për çdo program studimi si dhe tarifat përkatëse.