Pas Sindri Gurit, konfirmohen edhe gjashtë largime nga Korabi. Bëhet fjalë për titullarë si Ervis Kotorri, Erlis Frashëri, Alvaro Bisha, Halim Begaj, Sokol Mziu dhe Elton Muçollari. Burime të "Panorama Sport" konfirmojnë se lojtarët nuk kanë pranuar ofertat e klubit për rinovimet e marrëveshjes dhe në këtë mënyrë mund të quhen të larguar tashmë.
Ndërkaq, ekipi nisi stërvitjen dy ditë më parë ku u bë edhe prezantimi i trajnerit të ri, Artan Mërgjyshi. Gjatë prezantimit të teknikut të ri, drejtori sportiv i klubit, Femi Mëziu, në fjalën e tij deklaroi: "Urime profesor Tanit. Dua ta falënderoj për bashkëpunimin pas disa negociatash dhe garancisë, ai e pranoi me kënaqësi për të kontribuar për Korabin. Sot, si drejtues i stafit teknik dhe në vitet 1988-1990, ai kontribuoi edhe si lojtar. Duke falënderuar të gjithë ata miq dhe dashamirës që kontribuan për ekipin e Korabit, ne së bashku kemi marrë përgjegjësitë.
Timonieri i ri i skuadrës e njeh mjaft mirë ekipin që do të drejtojë. Një lajm tjetër i mirë për këtë klub vjen edhe nga bashkia, por edhe nga dy biznesmenët që do të jenë garancia e financave të klubit tonë gjatë këtij sezoni. Një sfidë e madhe na pret përpara në Superiore, por tashmë si drejtor i Korabit rritet më shumë përgjegjësia për ta përfaqësuar sa më denjësisht veten tonë si dibranë. Me kurajë, bashkëpunim dhe disiplinë, do të shihni një Korab si kurrë më parë", ka thënë drejtori sportiv i klubit, Femi Mëziu.
Stadiumi
Ndërkaq, pas zgjidhjes së problemit financiar ku dy donatorët nga Amerika dhe bashkia do të ndihmojnë klubin, është gjetur edhe stadiumi ku ekipi do të luajë takimet e sezonit të ardhshëm. Gjatë paradites së djeshme, është nënshkruar kontrata e rregullt me stadiumin "Selman Stërmasi", që ekipi t'i luajë aty takimet si skuadër pritëse. Gjithashtu, është zgjidhur edhe problemi se ku do të stërvitet ekipi. Për këtë është zgjedhur fusha stërvitore "Skënder Halili". Në bashkëpunim me klubin e Tiranës është arritur marrëveshja duke firmosur edhe kontratat mes tyre.
Abdulla Dushku
