Ismail Kadare fituesi i cmimit Jeruzalem

Shkrimtari shqiptar me famë botërore Ismail Kadare është shpallur fitues i çmimit ‘Jeruzalem për Lirinë e Individit në Shoqëri’, çmim që i jepet shkrimtarëve që kanë trajtuar temën e lirisë njerëzore në shoqëri. Atij do t’i jepet çmimi gjatë çeljes së Panairit Ndërkombëtar të Librit në Jeruzalem, që do të mbahet më 8 Shkurt.

Sipas jurisë, Kadare u përzgjodh për “rrëfimin e tij ironik e mbresëlënës” duke veçuar se ai “shkruan për ndjenjën e fajit kolektiv dhe natyrën e papenetrueshme të së vërtetës. Ndërkohë që subjektet dhe protagonistët e tij janë gjerësisht lokalë, domethënia dhe rëndësia e tyre është universale.”

Fitues të mëparshëm të këtij çmimi kanë qenë filozofi Bertrand Russell dhe shkrimtarët Mario Varga Llosa, Milan Kundera, Simone de Beauvoir, Susan Sontag, Arthur Miller, Haruki Murakami dhe Ian McEwan.