Jam bashkefajtor nuk duhet ti lija vajzat kurre vetem...

Kështu është shprehur i ati i tri vajzave të vrara në mënyrë brutale nga e ëma e tyre të dielën e 9 marsit. I ati i vajzave, Bashkim Dobrushi, 45-vjeç ka mundur të informohet për ngjarjen nga i vëllai i tij, i cili i komunikoi se duhej të kthehej menjëherë në Lecco të Italisë pasi e kërkonte policia. Vetëm me t’u rikthyer në qytetin ku jetonte prej 15 vitesh, mori vesh se vajzat e tij ishin vrarë nga nëna e tyre, ish-bashkëshortja e tij, nga e cila ishte divorcuar pak muaj më parë.

Mësohet se babai i viktimave do të merret sot në pyetje nga autoritetet për të zbuluar më shumë rreth shkaqeve dhe motiveve të këtij krimi monstruoz. Ndërsa trupat e të miturave pritet t’i nënshtrohen sot autopsisë. Mediet italiane shkruajnë se ka shumë mundësi që trupat e vajzave Simonës 14 vjeç, Keisi 10 vjeç dhe Sidni 3 vjeç,  të nisen drejt Shqipërisë për t’u prerë në banesën e fundit.  “Edhe pse nuk vazhdonim më bashkë, nuk kishte probleme mes nesh. Mund t'i shihja vajzat e mia të mrekullueshme sa herë që doja. Nuk mund t’ia fal kurrë. Ndiej pjesën time të fajit, pasi nëse do ta dija çdo të ndodhte, nuk do t’i kisha lënë kurrë”, - është shprehur Bashkimi.