Karnavalet Korca si Rio de Zhaniero

Ato do të vijnë nga qytetet e huaja me traditë në organizimin e tyre, dhe do të zgjojnë edhe një herë traditën e dikurshme dhe të mirënjohur të Korçës në mbarë vendin. Kështu i kanë cilësuar organizatorët e festivalit më të madh të vitit karnavalet e sivjetshme që do të kenë përmasa evropiane. Ata synojnë që të rikthejnë traditën e vjetër në qytetin e serenatave me paradën muzikore, figurat groteske, gazin dhe harenë e maskave dhe koloritin e kostumeve të shumta. Çdo grup pjesëmarrës do të paraqitet me fabulën e vet të shoqëruar me koreografi dhe skenar të veçantë. Krahas grupeve të të rinjve nga qytete të shumta të vendit, një festival karnavalesk i përmasave ndërkombëtare do të sjellë edhe karnavalet nga trevat e Ballkanit. Tashmë po punohet për dekorin në qytet. Ky i fundit, që është në hapat përfundimtare të përgatitjes, është ndërtuar me një skenografi të gjetur, me porta të mëdha hyrëse, ku do të parakalojnë karnavalet dhe me kitara të varura, ndërsa një kuzhinier shëtitës do të shoqërojë grupet që do të njihen gjatë paradës edhe me tradita të tjera të qytetit, siç janë këngët e hareshme dhe ato romantike të serenatave dhe birrën e qytetit. Butaforitë janë bërë gati. Mes tyre, krahas figurave të shumta gazmore dhe komike, do të jenë edhe figurat me indianë. Skulptorë të mirënjohur të qytetit po gdhendin të gjitha figurat butaforike shumëngjyrëshe dhe të larmishme që do të shoqërojnë karnavalet në ecjen e tyre përmes qytetit. Sallat e Pallatit të Kulturës janë kthyer në vendin ku po grumbullohet kostumografia, grupet e të rinjve dhe figurat butaforike. Organizatorët kanë marrë përsipër të bëjnë një festival të veçantë dhe masiv sipas kërkesave artistike me skenografi, muzikë dhe kolorit. Surprizat e këtij festivali do të jenë të shumta.

Organizatorët ngurojnë të tregojnë se cilat do të jenë fabulat që do të prezantohen, por mes tyre ka edhe histori dashurie të improvizuara nën shi e me vajza të lagura që kërcejnë me çadra në duar. Festivali i Karnavaleve, aktiviteti më i madh kulturor i këtij viti në qytetin e Korçës, që ka mbështetjen e "Top Channel", do të sjellë dhjetëra grupe nga vendi dhe Ballkani që do të kalojnë mes portave të cilat po ngrihen në sheshin qendror ku do të jetë edhe dera e madhe mikpritëse e tyre. Për dy ditë, organizatorët kanë menduar që të kenë gati të gjitha grupet, nga të cilat 13 vetëm nga qyteti pritës, Korça. E veçanta për ata është fakti se për të parën herë ai do të marrë përmasa evropiane dhe do të gërshetohet me ditën e çeljes së sezonit turistik, ku do të promovohen paralelisht me grupet groteske karnavaleske edhe traditat e vjetra të qytetit të serenatave. Për regjisorin e këtij festivali, Naum Terova, ky është qyteti i këngës dhe qejfit dhe si i tillë, karnavalet do të jenë ato që do të tregojnë më së miri gjallërinë e jetës kulturore dhe artistike. Për të, Karnavalet e Korçës vijnë pas një heshtjeje të gjatë dhe do të zgjojnë sërish traditën e dikurshme. Terova thotë se muzika e festivalit, skenografia, skicat dhe butaforitë këtë vit do të vijnë era Evropë. "E veçanta e këtyre karnavaleve është se ne nuk do ta mbajmë për vete, që do të thotë se, edhe pse Korça njihet për karnavalet e bukura në rang kombëtar, këtë vit rizgjimi i traditës së hershme do të vijë me përmasat e një festivali të madh evropian. Pas një heshtjeje të madhe të sistemit totalitar po rizgjojmë traditën me këtë festival me përmasa sa më cilësore në të gjitha drejtime", tha regjisori i aktivitetit. Organizatorët thonë se Karnavalet e Korçës vijnë me dy mesazhe, atë të traditës së dikurshme të artit dhe kulturës, por edhe me turizmin. Festivali i madh organizohet nga bashkia e qytetit, qendra kulturore "Vangjush Mio", teatri dhe drejtoria arsimore.

Nga : Gazeta Shqip