Përfaqësuesja shqiptare e futbollit do të hyjë në Euro 2016 si kombëtarja e 42-të në renditjen botërore të FIFA-s, por e fundit mes vendeve pjesëmarrëse në këtë aktivitet.
Në klasifikimin e botuar dje, kuqezinjtë kanë bërë hapa para në këtë renditje, pas dy muajsh ku kishin rënë në pozicionin e 45-të. Kundërshtari i parë i Shqipërisë në Euro 2016, Zvicra, mban vendin e 15-të në këtë klasifikim të përmuajshëm, e ndjekur nga Franca që mban vendin e 17, ndërsa Rumania është e 22-ta.
Por ajo që bie më shumë në sy është se kuqezinjtë e De Biazit janë të fundit mes 24 skuadrave pjesëmarrëse në Europian, ndërsa janë kaluar edhe nga ekipe që do ta ndjekin këtë aktivitet nga televizori si Greqia dhe Danimarka.
Renditja e FIFA-s kryesohet nga Argjentina, e cila ndiqet nga Belgjika, Kolumbia dhe Gjermania.
