Krimet e Renda 6 shqiptare te vrare ne Siri. Familjaret Vdiqen si heronj

Ndërsa flitet se gjatë këtyre dy viteve në Siri kanë humbur jetën në luftime nëntë shtetas shqiptarë, Prokuroria e Krimeve të Rënda konfirmonse të vrarët atje janë gjashtë.

Ata janë: Anri Maliqaj, 33 vjeç, lindur në Lezhë dhe banues në Prush të Tiranës, i martuar e me tre fëmijë; Ermal Xhelo, 35 vjeç nga Vlora, i martuar; Diamant Rasha, lindur në Dibër me banim më të fundit në Tiranë, me gjendje civile i martuar dhe me dy fëmijë, të cilët aktualisht i ka në Siri me bashkëshorten; Hasan Korvafaj, 58 vjeç, lindur në Kuç të Vlorës dhe banues në Tiranë, i martuar e me tre fëmijë; Hamit Myslija, 41 vjeç, lindur në Pukë dhe banues në Laprakë, i martuar me katër fëmijë; dhe Denis Jangulli, lindur në Dibër e banues në Tiranë, i martuar e me dy fëmijë.

Emrat e të vrarëve konfirmohen nga Prokuroria e Krimeve të Rënda, sipas një liste të dorëzuar nga Shërbimi Informativ Shtetëror, ndërkohë që në të njëjtën databazë të hetuesve ndodhen edhe emrat e tre personave që nuk dihet asgje për fatin e tyre, mes të cilëve Ervis Alinji dhe Bledar Hamza.

Në shtëpinë e Diamant Rashës, prindërit e tij nuk kanë pritur askënd për ngushëllime, pasi siç thotë i ati, Shaban Rasha jashtë kamerës, djali i tij është sheit, që në shqip do të thotë “dëshmor në rrugën e Zotit”.

Në familjen e Diamantit askush nuk pranon që të flasë për gazetarët sepse, siç shpjegojnë ata, asnjë nuk i kupton për largimin e të birit familjarisht në Siri për të mbrojtur besimin.

Ndërkohë, në krahun tjetër të lagjes ndodhet banesa e të afërmve të një tjetër të vrari në Siri, i cili i dha kthesë jetës së tij. Nga një farmacist, por edhe një besimtar, një ditë ai i kërkoi të ëmës leje për t’u larguar në luftë, leje të cilen nuk e mori e për këtë tha se po nisej në pelegrinazh.

Në shtëpinë e Denis Jangullit, njoftimi për vrasjen e tij erdhi me telefon, por familjarët nuk pranojnë që ai ka vdekur dhe thonë se ai ndodhet peng në Siri.

Familja e Denisit është njoftuar me një numër të panjohur me këtë mesazh: “Denisi ndërroi jetë në Siri. Mos bëni asnjë gjë që Denisi nuk do të dëshironte”. Në të njëjtën mënyrë janë njoftuar pothuajse edhe të afërmit e të tjerëve.