Të gjithë turistët, vendës dhe të huaj, të cilët duan të kalojnë pushimet në bregdetin e Ksamilit, përveç parave për të qëndruar në hotele apo shtëpi me qira, duhet të harxhojnë edhe për pagesën e një takse prej 100 lekësh të reja për çdo makinë që hyn në fshat.
Vendimi i çuditshëm është marrë nga Komuna dhe do të aplikohet për çdo mjet që do të futet në Ksamil apo në parkun kombëtar. Punonjësit e Komunës kanë vendosur një tra-taksambledhës që ulet e ngrihet në rrugën që lidh qytezën me detin.
Një vendim i papritur, që është shoqëruar me protesta nga banorët dhe sipërmarrësit e lokaleve turistike.
Banorët ankohen se e kanë ndërtuar vetë rrugën lidhëse me detin dhe taksa është e papranueshme.
Sipas tyre, ata janë vënë në dijeni përmes një dokumenti të firmosur vetëm nga Kryetari i Këshillit Bashkiak, pa marrë mendimin e plotë të anëtarëve të tjerë të këshillit.
Banorët janë përplasur me policinë e rendit duke e kundërshtuar këtë vendim.
