Dihet që marrëdhëniet mes Partizanit dhe Skënderbeut kanë qenë jo të mira në periudhën e fundit dhe betejat mes klubeve zhvillohen si brenda fushës së lojës, në merkato, por edhe në deklaratat mediatike. Një ditë më parë ishte Takaj ai që lëshoi një mesazh të fortë se Partizanit nuk i jepte as punëtorin e fushës dhe jo më Salihin.
Sot ka mbërritur përgjigjja e presidentit të "demave të kuq". Gaz Demi i ka dhënë një përgjigje po kaq të vrazhdë homologut të tij të Skënderbeut, që në prononcim e etiketon "ky djali". Ja deklarata e tij për gazetën:
"Salihi, kam dëgjuar se është djalë i mirë, por s'kam dijeni që ta ketë kërkuar Partizani. Për punëtorët e fushës kam respekt njësoj si për lojtarët. Për sa ka thënë ky djali, pyesni atë se unë nuk kam kohë të merrem me delirantizma", është shprehur Demi. Klubi i kuq kërkoi gjithashtu që të merreshin masa kundrejt korçarëve pas dënimit që morën nga UEFA për manipulim ndeshjesh. Një tjetër përplasje e fortë mes tyre lindi edhe për çështjen "Fejzullahu", pasi Skënderbeu humbi gjyqin në DHZK për ta bërë të tijin mbrojtësin e kuq.
Çfarë tha Takaj
Takaj i ka bërë barrikadë dëshirës dhe synimit të të kuqve për të pasur në ekip sulmuesin më të mirë të Superligës. I pyetur nga "Panorama Sport" në lidhje me të ardhmen e sulmuesit dhe faktin nëse do ta linte të lirë për të shkuar te Partizani, Takaj u përgjigj: "Ta harrojnë!". Ai kishte kohë për të bërë edhe ironi apo batuta me ekipin, ku një vit më parë rivalizoi deri në javën e fundit për titullin kampion.
"Partizani nuk e merr dot Salihin dhe unë nuk kam ndër mend ta lëshoj. Ata ta harrojnë se mund ta kenë në ekip, jo vetëm Salihin, por asnjë punëtor fushe të Skënderbeut", tha Takaj një ditë më parë. Hamdi Salihi u transferua një vit më parë në Korçë, duke u shndërruar në një nga pikat më të forta të skuadrës. Ai e ndihmoi ekipin të kualifikohej për në grupet e Europa Ligës dhe të fitonte sërish kampionatin.
