Nga qielli është Toni, i cili mbështetjen e tij për "dhelprat" do ta japë deri në fund. Dhe pastaj do të jenë 32 mijë zemrat brenda "King Power Stadium" në "Filbert Way". 
Të gjithë të bashkuar për të rinisur vrapimin pas ndalesës me polemika në barazimin 2-2 ndaj Uest Hemit.
Duhet harruar gjithçka dhe sa më shpejt që të jetë e mundur përpara ndeshjes më të lehtë (të paktën në letër) që i ka ngelur Leiçesterit në sprintin e fundit. Përballë sot është Suonsi, por edhe frika për të fituar... frika për të shkruar një faqe të historisë së futbollit, madje përrallën më të bukur dhe të pabesueshme të historisë së futbollit botëror.
Por nuk duhet harruar se 5 pikët diferencë me Totenhemin janë një avantazh i konsiderueshëm (gati dy ndeshje) dhe vetë Spërsat duhet të përballen me Çelsin, përveç Uest Bromuiçit, Sauthemptonit dhe Njukasëllit. Do të jetë vendimtare për të mos u fshehur pas frikërave që e shohin pezullimin e Vardisë si një ogur të keq dhe Ranieri për vete nuk e bën më: "Mund t'ia dalim. Është momenti i duhur dhe unë jam optimist".
Këshillat e psikiatrit
Dhe për të mposhtur këto frikëra, që për disa është në kufijtë e terrorit, zbret në fushë edhe një doktor, Mark MekKonoki, konsulent psikiatër, i cili për faqet e "Leicester Mercury" shpjegon si duhet përballuar stresi i takimeve të mbetura: "Stresi është si një llastik: njeriu nuk arrin të punojë në maksimumin e potencialit të tij pa dozën e duhur të stresit.
Por çfarë mund të bëjmë për të shmangur dozën e tepërt të tij? Ai shtohet përpara një pune shumë të vështirë dhe zvogëlohet përpara një pune të lehtë. Një mënyrë për ta reduktuar është që të nisim të shqetësohemi vetëm për objektivin e radhës. Prandaj, në vend që Leiçesteri të mendojë se duhet t'i fitojë të gjitha ndeshjet e mbetura, duhet të stresohet për të fituar vetëm atë të radhës".
Atëherë mesazhi është i thjeshtë dhe logjik: Mendjen te Suonsi sot, për të marrë 3 pikët dhe arratisur në +8 nga Totenhemi. Ku i dihet, kjo distancë mund të fusë në stres londinezët.
Përgatiti: ANDROKLI DRALO
