Ligji per Arsimin 200 pedagoge memorandum Kuvendit

Rreth 200 pedagogë të Universiteteve publike, të mbështetur nga mijëra qytetarë dhe studentë pritet të hartojnë brenda disa orësh një memorandum kundër Projektligjit mbi Arsimin e Lartë për t’ia paraqitur Kuvendit të Shqipërisë.

Lajmi është bërë i ditur nga Artan Fuga, shef i Departamentit të Gazetarisë dhe Komunikimit në Universitetin e Tiranës, përmes një postimi në Facebook.

Ky ligj i ri për Arsimin është shoqëruar me pakënaqësi nga studentët dhe protesta, përmes të cilave i kanë kërkuar Kuvendit mosmiratimin e ligjit. Abuzimi me autonominë është një nga arsyet përse ky ligj nuk është mbështetur nga pedagogët. Pedagogët argumentojnë se po vihet në rrezik autonomia e institucioneve të arsimit të lartë dhe liria akademike, e cila garantohet me ligj:

“Autonomia e këtyre institucioneve mbaron në çastin kur anëtarë të bordit administrativ të institucioneve të arsimit të lartë, si persona të deleguar në këto funksione nga Ministria e Arsimit, parashikohet të kontrollojnë të gjitha aspektet thelbësore të jetës universitare”.