MPB e mohon se kercenuesi i Lufthansa-s eshte nga Kosova

Ministria e Punëve të Brendshme së Kosovës sqaron se personi i dyshuar në incidentin në aeroplanin e “Lufthansa”, në lidhjen Munich-Budapest, Muslim Halili, nuk është shtetas kosovar.

“Në bazë të kërkesës për riatdhesim nga Portugalia për Muslim Halimin, të bërë më datë 10.01.2012 dhe pas të gjitha fazave të verifikimit, autoriteteve portugeze u është kthyer përgjigje negative për riatdhesimin e këtij personi”, thuhet në sqarimin e MPB-së.

Në bazë të të dhënave të identitetit të personit të deklaruar për shtetësi kosovare, por edhe të dhënave të familjareve që ka ofruar personi dhe autoritetet gjermane, pas kërkimeve dhe verifikimeve nga MPB, përmes agjencive të saj, rezulton që personi në fjalë nuk është shtetas kosovar.

“Kërkesa e dytë për verifikim me qëllim riatdhesimi është pranuar me datë 23.08.2012, nga Departamenti për Shtetësi, Azil dhe Migracion, e adresuar nga autoritetet holandeze”, bën me dije MPB.

Pas shqyrtimit të kërkesës, kërkesa është adresuar për shqyrtim dhe verifikim në terren, Drejtorisë Rajonale të Policisë Kosovës në Prishtinë, nga të cilët pas verifikimit është kthyer. Po ashtu edhe autoritetet hungareze kanë kërkuar të dhëna për këtë person nga MPB-ja, të cilëve u është kthyer përgjigja.

“Personi i cekur nuk është gjetur në asnjë regjistër dhe askush nuk e njeh që na bien te konkluzioni se nuk është shtetas i Kosovës”, përfundon sqarimi i MPB-së