Fitorja ndaj Tërbunit në shifrat 4-1 ka pasur protagonistët e saj te skuadra e Teutës. Një prej tyre ishte edhe sulmuesi Artur Magani me dopietën e tij. "Ishim përgatitur për të marrë një fitore të rëndë- sishme këtë javë dhe e arritëm atë duke dhënë më të mirën tonë në fushën e lojës, ndaj një ekipi që lufton në fundin e tabelës.
Pas barazimit të rezultatit nga ana e Tërbunit, kemi reaguar mirë dhe në fund jemi shpërblyer me tri pikë mjaft të vlefshme", është shprehur Magani, i cili flet për golat dhe objektivat e ekipit. "Jam i lumtur që arrita të shënoj, por golat janë për të gjithë ekipin, pasi grupi i ka meritat për ta.
Humbja e Tiranës dhe Kukësit na ka dhënë mundësi që të barazohemi me pikë me vendin e tretë. Megjithatë asgjë nuk ka përfunduar në këtë drejtim, pasi skuadrat janë ngjeshur shumë si në krye, ashtu edhe në fundin e tabelës", vazhdoi Magani.
Objektivi - Teuta synon që në fund të kampionatit të jetë në vendin e tretë në klasifikim dhe të sigurojë pjesëmarrjen në Kupat e Europës. "Ka ende edhe shumë javë dhe arritja e objektivit varet vetëm nga ne. Duhet të bëjmë maksimumin në çdo përballje që na ka mbetur për të marrë pikët e plota.
Përpara ndeshjes me Tërbunin ishim në tension, pasi fitorja na duhej me çdo kusht për të hedhur një hap drejt objektivit tonë", vazhdoi sulmuesi durrsak, që nuk lë pa komentuar edhe ndeshjen e radhës ndaj Tiranës.
"Do të doja që në këtë sfidë të shënoja dhe besoj se jo vetëm unë, por të gjithë lojtarët kanë dëshirë që ta bëjnë këtë gjë ndaj bardhebluve. Do të jetë një ndeshje e vështirë, por ne jo vetëm ndaj Tiranës, por në të gjitha takimet e mbetura do të luajmë me shpirt për të mos lëshuar në asnjë moment.
Uroj që fundi i kampionatit të na gjejë në vendin e tretë në renditje, në mënyrë që ta mbyllim me sukses këtë sezon futbollistik", ka mbyllur Magani.
Sulmuesi, gjatë këtij sezoni futbollistik, ka arritur të shënojë dy herë dopietë. E para ka qenë në sfidën ndaj Flamurtarit dhe e dyta ndaj Tërbunit, në ndeshjet e kësaj jave. Lojtari po kalon një formë mjaft të mirë me durrsakët dhe shpreson që ekipi të arrijë objektivin final. Teuta deri më tani ka zhvilluar një sezon të shkëlqyer edhe pse është një ekip me lojtarë të rinj në përbërje.
