Kartoni i Rei Manajt tashmë është 100% në pronësi të Interit, pasi klubi zikaltër ka ushtruar të drejtën e blerjes së tij nga Kremoneze.
Drejtori sportiv i Kremonezes, Stefano Xhamarioli, ka sqaruar për mediat italiane se Interi ka shpenzuar shifrën e 500 mijë eurove të parashikuar në akordin e firmosur mes klubeve në verën e kaluar, kur Manaj kaloi te skuadra e Serisë A.
"Kemi mbyllur gjithçka për kalimin e Rei Manajt te Interi, pasi ata ushtruan të drejtën e blerjes në kontratë", tha Xhamarioli, duke vulosur gjithçka për transferimin e futbollistit.
Megjithatë, kjo nuk do të thotë se Manaj do të mbetet pjesë e Interit në sezonin e ardhshëm. Zikaltrit kanë filluar bisedimet me klube të ndryshme të Serisë B të cilat duan të huazojnë sulmuesin dhe janë të gatshme që t'i japin atij hapësirën e nevojshme për t'u aktivizuar, të cilën Interi për momentin nuk ia garanton.
