J uventus Stadium" mbajti frymën me të drejtë në minutën e 15- të, kur një përplasje mes Vazkuezit dhe Markizios përfundoi me mesfushorin bardhezi të shtrirë në tokë, i cili menjëherë vuri duart në fytyrë, duke dhënë imazhin e një dëmtimi të rëndë.
Pas inspektimit të parë, menjëherë u kuptua qartë se numri 8 i formacionit të Masimiliano Alegrit vuante një problem të rëndë, aq sa menjëherë futbollisti italian u dërgua në klinikë për t'u njohur me rëndësinë e dëmtimit.
Dhe pak pas orës 18:00 ka ardhur lajmi që të gjithë në radhët e klubit të Juventusit dhe në kombëtare i trembeshin: Klaudio Markizio ka këputur ligamentet e gjurit të majtë, një dëmtim shumë i rëndë, i cili për t'u kuruar kërkon nevojën e një ndërhyrjeje kirurgjikale, por në të njëjtën kohë kërkon edhe një kohë të gjatë riaftësimi.
Periudha pritet të jetë nga 4-8 muaj, por për të dhënë një përgjigje më të qartë do të pritet kryerja e operacionit, i cili pritet të bëhet brenda kësaj jave. Operacioni pritet të kryhet në Itali, ndonëse nuk mohohet as ndërhyrja në një klinikë të huaj.
Ky lajm ka nervozuar Juventusin, por mbi të gjitha trajnerin e Kombëtares së Italisë, Antonio Konten, i cili shihte te 29-vjeçari mesfushorin e vetëm të pazëvendësueshëm të formacionit të tij. Pas lajmit për dëmtimin e rëndë që ai pësoi, jo vetëm tifozët bardhezi dhe të tijtë personalë, por edhe shumë klube, duke nisur nga Milani, i kanë shprehur urimet për shërim të shpejtë futbollistit.
Reagimi i Markizios Duke parë urimet e shumta që ka marrë, Klaudio Markizio ka postuar një foto në shtëpi, në të cilën ka komentuar: "I sapokthyer në shtëpi. Përgjigjet që më dha rezonanca magnetike nuk mund të më lumturojnë, por këto janë rreziqet e profesionit tonë. Kam forcë dhe dëshirë për t'u kthyer sa më shpejt që të jetë e mundur në fushë. Ndërkohë, po shijoj gëzimin që na dhuroi kjo fitore e madhe me Palermon. Tani jemi të gjithë shumë pranë objektivit të madh. Bravo skuadrës! Forca Juventus! Ne nuk dorë- zohemi kurrë".
