Nga Kazakistani, Mali i Zi apo Ukraina, në zemër të Europës. Kukësi do të përballet sot me Austrinë e Vjenës në një sfidë luksi ndaj një emri të madh. Pas eliminimit të Rudarit, kuksianët i pret një përballje shumë e vështirë ndaj Austrisë.
Megjithatë, verilindorët besojnë se mund të surprizojnë dhe të sigurojnë një rezultat pozitiv. Udhëtimi Rreth orës 10:00, çarteri i porositur nga Kukësi ishte gati për fluturim. Përveç delegacionit të klubit, që përbëhej nga rreth 40 persona, pjesa tjetër e avionit, rreth 40 vende ishin të lira. Dhe ato u shfrytëzuan nga mbështetës të skuadrës për të udhëtuar drejt Vjenës.
Klubi i Kukësit kishte ftuar këdo që dëshironte të shkonte së bashku me skuadrën në këtë transfertë, vendet ishin të lira kundrejt pagesës 350 euro për person. Në të përfshihej bileta e avionit, bileta e stadiumit, akomodimi dhe ushqimi për dy ditë. Thirrjes së drejtuesve iu përgjigjën kryesisht biznesmenë nga Kukësi që jetojnë në Tiranë. Ndërkaq, nuk udhëtuan me ekipin Polizoi Arbri, Resul Kastrati dhe Edon Hasani. Për sa i përket Kastratit, klubi ka bërë të ditur se është larguar përfundimisht nga skuadra. 22-vjeçari nuk ka gjetur hapësira dhe ka vendosur të largohet nga ekipi.
Skema
Në sfidën e sotme, do të jetë një Kukës ndryshe në fushë, në krahasim me dy takimet ndaj Rudarit. Dje është federuar zyrtarisht edhe huazimi më i fundit nga Skënderbeu, Masato Fukui. Gjithashtu, stafi ka ndryshuar mendjen në lidhje me Gentjan Muçën duke e federuar. Hasan Lika e ka në kokë formacionin titullar.
Portën pritet ta mbrojë Enea Koliçi, ndërsa mbrojtja do përbëhet nga katërshja e konsoliduar, Hallaçi në të djathtë, Ylli Shameti e Renato Malota në qendër, ndërsa Mici në të majtë. Mesfusha pëson edhe ndryshimet më të mëdha.
Të tre lojtarët e huazuar nga Skënderbeu, Lilaj, Latifi, Fukui priten të jenë titullarë, ku së bashku me Musollin dhe Kariokën do përbëjnë boshtin me 5 mesfushorë. Në sulm i vetëm do të jetë 21-vjeçari Lukas Rangel. Në këtë mënyrë mbeten jashtë dy titullarë si Izair Emini dhe Matija Dvorenkoviç.
Lika
Në lidhje me përballjen e sotme, trajneri Hasan Lika, përpara udhëtimit me ekipin, u shpreh: "Çdo kundërshtar në Europë është i vështirë dhe Austria pa dyshim që është një ekip më i fortë se Rudari. Por, ne jemi përgatitur për të dhënë maksimumin. Objektivi është për t'u kualifikuar dhe synojmë një rezultat pozitiv në këtë takim. Skuadra ka ardhur në rritje", tha Lika.
