Teuta ka zhvilluar dje seancën e fundit stërvitore në stadiumin e Kairat Almati gjatë së cilës trajneri elbasanas Julian Ahmataj ka skicuar formacionin me të cilin do të përballojë ekipin kundërshtar. Stafi teknik nuk e ka sfrocuar shumë ekipin para ndeshjes, në mënyrë që të mos rrezikonte që lojtarët të pësojnë ndonjë dëmtim në prag të takimit që do të luhet sot, në orën 20:45 me orën lokale dhe 16:45 me orën e vendit tonë.
Pas humbjes në ndeshjen e parë, Teutës i duhet medoemos një fitore me diferencë një gol, që të vazhdojë të jetë pjesë e Europa Ligës, por një gjë e tillë nuk do të jetë aspak e lehtë, duke parë se përballë ka një skuadër mjaft cilësore, e cila ka në përbërje futbollistë me emër në arenën ndërkombëtare. Në mbështetje të ekipit, kanë udhëtuar pothuajse të gjithë drejtuesit, të cilët kanë motivuar lojtarët. Që para nisjes, durrsakët kanë deklaruar se do të luajnë të gjithë shanset e tyre për të siguruar kualifikimin në turin tjetër të këtij kompeticionit.
Deklarata
Gardiani i durrsakëve, Shpëtim Moçka, i kontaktuar nga "Panorama Sport", shprehet se skuadra e tij do të provojë deri në minutën e fundit për të vazhduar më tej, duke mos u dorëzuar në asnjë moment. "Nesër (sot) do të luajmë ndeshjen finale sa u takon Kupave të Europës. Humbja që pësuam në Durrës na e ka komplikuar edhe më shumë kualifikimin në turin tjetër të këtij kompeticioni, megjithatë ne nuk jemi të dorëzuar.
Do të luftojmë deri në minutën e fundit të takimit duke dhënë maksimumin dhe duke besuar te kualifikimi. Pastaj se si do të shkojë takimi, kjo do të mbetet për t'u parë", ka thënë Moçka, i cili ka bërë një paraqitje të mirë në ndeshjen e parë të luajtur në Durrës. Teuta ka në përbërje lojtarë të rinj që kanë befasuar yjet e Kairat në ndeshjen e parë. Një gjë të tillë e kanë konfirmuar lojtarët dhe trajneri i skuadrës kundërshtare, duke pranuar se ekipi i drejtuar nga Ahmataj i kishte vënë jo pak në vështirësi, gjë të cilën nuk e kishin pritur.
Jeton Rexhmati
