Zhoze Murinjo do të stërvisë Mançester Junajtid sezonin e ardhshëm. Dhe tashmë nuk do të ketë më dyshime, edhe pse Luis Van Gal i udhëhoqi "djajtë e kuq" drejt trofeut të "FA Cup" pasditen e djeshme. 
E zbulon "As"
Lajmi se portugezi ka arritur një paraakord me 20 herë kampionët e Anglisë qarkullon që prej muajit shkurt-mars, por madrilenia "As" zbulonte se tashmë gjithçka ka përfunduar me sukses dhe 53-vjeçari do të jetë pasardhësi i Luis Van Galit në "Old Trafford". Madje, spanjollët parashikonin që zyrtarizimi të bëhej që ditën e djeshme pas finales së "FA Cup", por lajmi i madh pritet të vijë në orët në vijim.
"Negociatat mes administratorit të deleguar të Mançester Junajtid, Eduard Uduard, dhe menaxherit të trajnerit luzitan, Zhorzh Mendez, - shkruan "As", - janë mbyllur me sukses në fillim të kësaj jave ku është firmosur edhe parakontrata".
Speciali do të firmosë një kontratë 3-vjeçare, ashtu siç ka qenë prej kohësh e paralajmëruar, nga e cila do të përfitojë 15 milionë euro në sezon, ose 45 milionë euro në tri vite. Mou, i cili prej shkarkimit nga Çelsi në dhjetorin e vitit të shkuar e ka pranuar se do të rikthehet në stolin e një klubi të madh në korrik, do të ketë në dispozicion 250 milionë paund për merkaton e verës, aq sa kishte edhe Van Gal në sezonin e shkuar. Pavarësisht se holandezi këmbëngul se ai do ta respektojë edhe vitin e fundit të kontratës në Mançester, ai ka humbur mbështetjen e dhomave të zhveshjes: kështu që klubi nuk mund të tolerojë që skuadra të drejtohet nga dikush, i cili ka humbur besimin e lojtarëve.
Me plotësimin edhe të pazëllit të fundit, Anglia do të konfirmohej kampionati më spektakolar në Europë, jo vetëm nga ajo që prodhojnë skuadrat në fushë, por edhe nga shkëlqimi që do të vijë nga stoli: Guardiola-Murinjo do e zhvendosin rivalitetin e tyre nga Spanja në derbin e Mançesterit, ndërsa Klop te Liverpuli, Poketino te Totenhemi apo edhe Ranieri te Leiçesteri garantojnë një sezon të çmendur në Premier Ligë.
