Nje komedi shqiptare hap sezonin

“Harroje Dashurinë” është shfaqja që do të hapë sezonin artistik në Teatrin e Komedisë. Një komedi e shkruar dhe e vënë në skenë nga Erion Kame, që përmes groteskut kërkon të sjellë në skenë realitetin shqiptar. Genci Fuga, Elia Zaharia, Helidon Fino, Lulzim Zeqja, Esmeralda Kame, Arjola Basho, Xhevahir Zeneli, janë kasti i aktorëve të zgjedhur. Genti Rushi ka kompozuar pjesën muzikore për këtë komedi, ndërkohë që Genc Shkodrani ka bërë skenografinë. “Nuk e kam pasur të lehtë që ta shkruaj këtë vepër. Por për rrethanat ku ndodhesha, i papunë, mendova pse të mos e provoja. Kam pasur referenca si nga dramaturgë europianë dhe ata botërorë.

Nga ana tjetër jam përpjekur të sjell një pjesë sa më shqiptare. Personazhet, konfliktet, tema e trajtuar i përkasin këtij realiteti”, ka thënë regjisori Erion Kame. Një biznesmen i ri zbulon se e shoqja e tij e tradhton. I tronditur nga kjo ngjarje pëson aksident me makinë. Kur përmendet zbulon se ka humbur kujtesën dhe nuk mban mend asgjë nga pesëmbëdhjetë vitet e fundit të jetës së tij, përfshi edhe martesën.

I dashuri i së shoqes përpiqet t’i marrë gruan, ndërsa ortaku i biznesit, kërkon t’i marrë agjencinë e udhëtimeve që kanë hapur bashkë. Gruaja është në dilemë të rrijë apo të ikë. Është një qerthull ngjarjesh që sipas regjisorit duhet të bëjnë të qeshësh, por edhe të mendosh. Premiera botërore u dha në Gjakovë, ndërsa të shtunën, në orën 19:00, vjen premierë në Tiranë.