Sopotin Në stadiumin "Kastrioti" të Krujës u zhvillua ndeshja midis Sopotit dhe Pogradecit, e cila përfundoi me rezultatin 2-0 në favor të liqenorëve, të cilët ndjekin hap pas hapi Luftëtarin e vendit të parë.
Loja nis e qetë me raste sporadike nga të dyja skuadrat. Por miqtë janë më kërkues, teksa vendosin disa herë në vështirësi portierin mik me anë të Mihanit, Pintos dhe Agastrës, por që nuk arrijnë të zhbllokojnë shifrat.
Megjithatë, në të 16-ën, pogradecarët fitojnë një goditje dënimi në distancë rreth 20 metra në të djathtë të portës së mbrojtur nga Saraçi. Ekzekutimi kryhet nga Mihani, topi i të cilit përfundon në rrjetë duke kaluar miqtë në avantazh. Librazhdasit mundohen të reagojnë, por nuk arrijnë të depërtojnë në zonën mike. Ndërsa liqenorët në të 26-ën shënojnë edhe golin e dytë dhe të sigurisë.
Është shtatlarti Agastra, i cili, i gjendur në brendësi të zonës, nuk e ka të vështirë të mposhtë portierin mik duke i çuar shifrat në 0-2. Pas shënimit të golit të dytë, pogradecarët ndihen më të qetë, ndërsa librazhdasit herë pas here i drejtohen kryesorit Sokoli për njëanshmëri në dhënien e faulleve. Edhe pse e mbyllën pjesën e parë në avantazhin e dy golave, miqtë nga Pogradeci hidhen sërish në kërkim të golit në pjesën e dytë. Janë kombinime perfekte midis dyshes Mihani dhe Agastra, të cilët shfaqen rrezikshëm në portën mike me raste të njëpasnjëshme, por që nuk gjejnë dot rrugën e rrjetës.
Në të 52-ën, Agastra driblon portierin mik dhe i vetëm përpara portës së boshatisur nuk arrin të shënojë. Në të 75-ën, Sopoti ka një mundësi të ngushtojë shifrat, pasi Pashaj ka krosuar në zonën e Pogradecit, por mbrojtja mike spastron zonën.
SOPOTI-POGRADECI 0-2
GOLAT: Mihani 16´, Agastra 26´
SOPOTI: Saraçi, Dino, Zeqaj, Pashaj, Kastrati (Polisi 34´), Kacani, Gjeçi, Misteri, Çota, Çaushaj, Bërdufi (Selmanaj 67´). Trajner: A.Bozhani
POGRADECI: Bytyçi, Pura, Bella, Hysenllari, Zguro, Liçkollari, Topllari (Berberi 80´), Shyti, Mihani (Gjonaj 77´), Agastra (Shkullaku 75´), Pinto. Trajner: G.Stojku
KARTONË TË VERDHË: Çaushaj 4´, Çota 30'/ Bytyçi 90´
GJYQTARË: S.Çekaj, G.Koka, E.Çuni (Laç)
VËZHGUES: A.Lulaj DELEGAT: A.Mone
Liridon Pasha
