Zhoze Murinjo është prezantuar sot zyrtarisht si trajneri i ri i Mançester Junajtid dhe siç ndodh zakonisht kur portugezit i vihet para një mikrofon, deklaratat e tij kanë qenë mjaft interesante.
"Emërimi te Mançester Junajtid nuk më bën nervoz, vjen në momentin e duhur të karrierës time. Unë vij në një klub i cili është e vështirë të përshkruhet. Nuk është puna e ëndrrave, ky është realiteti. Kjo është një detyrë të cilën të gjithë e duan. Jo të gjithë e kanë mundësinë ta kenë këtë punë, unë e kam", ishin fjalët e para të Murinjos.
Ai menjëherë ka preferuar të injorojë duelin me rivalët e Mançester Sitit, duke bërë të qartë se skuadra e drejtuar nga Pep Guardiola do të ishte e njëjtë me të gjitha ekipet e tjera në Angli. "20 skuadra mund ta fitojnë titullin kampion. Nuk ka kuptim që të përqendrohemi vetëm të një dhe unë nuk do ta bëj një gjë të tillë. Unë jam trajneri i klubit më të madh në Angli, ndaj do të fokusohem te vetja", tha ai.
Murinjo pranoi gjithashtu se i kishte vënë objektiv vetes të arrinte rekordet e Aleks Ferguson në Ligën e Kampioneve, ndaj ishte i pakënaqur që nuk do të luante në këtë sezon në turneun më të famshëm për klube në Europë.
"Më vjen keq që nuk luajmë në Ligën e Kampioneve. Nuk e fsheh që po ndjek rekordet e Aleks Ferguson në këtë turne. Shpresoj që të mbetemi jashtë vetëm një sezon. Mançester Junajtid është një klub për Ligën e Kampioneve dhe duhet të sigurohemi që në korrikun e vitit 2017, në vend që të presim për shortin e Ligës së Europës, ky klub të jetë aty ku e meriton".
Në fund, portugezi ka zbuluar edhe këshillën më të vyer që i ka dhënë këto ditë Sër Aleks Ferguson.
"Më tha merr gjithmonë çadër me vete. Dje, nuk më besohej që në fushën stërvitore të klubit binte shi. Ishte një këshillë e shkëlqyer.
Një tjetër këshilla ishte që të merrja gjithmonë me vete një shishe verë, pasi tani do të kemi mundësi të takohemi më shpesh. Ai do të jetë gjithmonë i mirëpritur në fushën e stërvitjes dhe do të kemi shumë kohë për të ndarë idetë tona, opinioni i tij është shumë i rëndësishëm për mua", deklaroi Murinjo.
