TIRANE, 3 Nëntor /ATSH/ - Kryeministri Edi Rama dhe Presidenti i së majtës europarlamentare, Gianni Pittella, në përfundim të takimit të sotëm në selinë qeveritare, deklaruan se, viti 2016 do të jetë viti i hapjes së negociatave për anëtarsim të Shqipërisë në BE. Gjatë konferencës së përbashkët për mediat, Rama bëri të ditur se, në fokus të bisedimeve me eurodeputetin e majtë, ishin procesi i reformave, vecanërisht ajo në drejtësi dhe cështja e krizës së refugjatëve të larguar nga konflikti i armatosur në Siri.
Ndërsa falenderoi grupin e posacëm të ekspertëve vendas dhe të huaj për hartimin e paketës së reformës në drejtësi, e cuar tashmë pranë Komisionit të Venecias, në pritje të reagimit Rama u shreh shpresëplotë për një konfirmim të rëndësishëm deri në fillim të muajit dhjetor.
Sa i përket cështjes së refugjatëve të ikur nga konflikiti i përgjakshëm, ashtu si në Samitin e Brukselit, Rama shprehu gatishmërinë e plotë të qeverisë që drejton për të marrë përgjegjesitë dhe rolin që i takon në përballimin e krizës, ashtu si vendet e tjera të Ballkanit, anëtare ose jo të BE-së.
"Siç e theksova edhe në Samitin e Brukselit, Shqipëria është e përgatitur të marrë përgjegjësinë dhe të luajë rolin e saj si gjjithë vendet e tjera të Ballkanit dhe të bëjë gjithcka për të lëhtësuar sado pak këtë krizë dhe për t'iu gjendur pranë një aleati të madh", deklaroi kreu i ekzekutivit.
Eurodeputeti Pittella, pasi rikonfirmoi deklaratën e kryeministrit se 2016 do të jetë viti i hapjes së negociatave për anëtaresim të Shqipërisë në BE, shprehu vlerësim për punën e deritanishmë të qeverisë në drejtim të përmbushjes së reformave si kusht për përafrimin me BE-në.
Ai u shpreh mirënjohës ndaj Shqipërisë dhe vendeve të Ballkanit, të cilat po japin gjithë gatishmërinë për përballimin e krizës së refugjatëve që pritet të përfshijë dhe vendin tonë.
"Per vendet e Ballkanit, që nuk janë pjesë e BE-së dhe po marrin përgjegjësi në përballimin e kësaj krize, ka një domethënie të madhe nga pikpamja politike", nënvizoi Pittella. /a.ke/
