SHBA kush votuan te paret dhe kush te fundit

Pas një fushate elektorale që ka nisur dy vjet më parë, më në fund Shtetet e Bashkuara të Amerikës votuan për të përcaktuar njeriun që do pasojë Xhorxh Bushin në Shtëpinë e Bardhë. Sondazhet e shohin kandidatin demokrat, Barak Obama, në avantazh të ndjeshëm ndaj republikanit Xhon MekKein, ndërkohë që fitorja e të parit do t‘i jepte Amerikës për herë të parë në historinë e vet një President me ngjyrë. Një zhvillim me përmasa historike për këtë komb gjatë këtyre 232 viteve.

Siç e do tradita elektorale amerikane, rezultati i parë mbërriti nga qendra elektorale e Diksvill Nortç i Nju Hemshairit, ku 21 zgjedhësit votuan që të gjithë njëherësh në mesnatën e mbrëmshme: 15 prej tyre ia dhanë votën Obamës, 6 MekKeinit. Kandidati me ngjyrë fitoi edhe në Hart‘s Lokeishon, një tjetër zonë mikroskopike e Nju Hempshairit, e cila gjithashtu, sipas traditës, voton menjëherë pas mesnate: 17 vota për Obamën kundër 10 të MekKeinit. Në orën 05:00 të mëngjesit (ora 11:00 në Shqipëri) u hapën qendrat e votimeve në shtetin Vermont. Rezultatet e para domethënëse, falë të cilave do mund të krijohet një ide mbi fituesin, pritet të bëhen publike në orën 19:00 (ora 01:00 e mëngjesit të së mërkurës në Shqipëri), kur gjashtë shtete do kenë përfunduar procesin e votimeve.

Votimi në Nju Hempshair

Për të ruajtur rekordin e zonës elektorale, që shpall rezultatet e para ndër të tëra, që të gjithë zgjedhësit e Diksuill Notçit- i cili përbëhet nga 75 rezidentë -votojnë njëherazi në mesnatë. Për t‘ua mundësuar këtë, secili votues ka kabinën e vet. Fletët e votimit futen sa më shpejt të jetë e mundur në kutinë e votimit, ndërkohë që po me kaq urgjencë bëhet edhe numërimi. Për t‘u vërejtur është se numri i reporterëve që e ndjekin këtë operacion është tri herë më i madh se ai i votuesve.

Diksuill Notç e ruan që prej disa zgjedhjeve presidenciale këtë rekord. Zakonisht votat republikane në këtë zonë i kalojnë ato të demokratëve dhe rezultati i kësaj qendre zgjedhore konsiderohet absolutisht pa asnjë lloj peshe si tregues i prirjeve zgjedhore në rang kombëtar. Është pikërisht kjo arsyeja për të cilën fitorja e ndjeshme e kandidatit me ngjyrë nuk mund të kalonte pa njëfarë jehone. Për disa ishte zanafilla e një dallge votash pro Obamës, ashtu siç tregojnë edhe të gjitha sondazhet, duke e bërë kandidatin demokrat të parin President me ngjyrë në Shtëpinë e Bardhë.

Radhët e gjata të votuesve

Në një numër të madh qendrash votimesh nëpër mbarë Shtetet e Bashkuara të Amerikës u regjistruan radhë të gjata zgjedhësish në pritje për të dhënë verdiktin e atyre që konsiderohen tashmë si zgjedhjet të cilat do ndryshojnë Amerikën: në Nortgolk të Virxhinias, një numër i madh votuesish u vunë në radhë qetësisht që në orën 04:00 të mëngjesit, pavarësisht se qendrat nuk ishin hapur ende dhe kjo ishte një skenë që u përsërit vazhdimisht në disa prej shteteve amerikane. Në Virxhinia, një prej shteteve barometër, rezultatet e së cilës konsiderohen si të përafërta me ato përfundimtaret në gjithë Amerikën, qendrat e votimeve mbyllen në orën 19:00 (01:00 e mëngjesit me orën shqiptare). Në këtë orë parashikohet të mbyllen votimet në 6 shtete. Ndërkohë që pikërisht në Riçmond, kryeqytetin e Virxhinias, u prishën rreth 700 makina elektorale, duke ndaluar në disa qendra procesin e votimit.


Oraret e mbylljes së qendrave të votimeve


Rezultatet e votimeve në zgjedhjet amerikane nisën të mbërrijnë gjatë orëve të vona të natës dhe në vazhdim gjatë ditës së sotme. Ja edhe disa nga parashikimet e dorëzimit të rezultateve:

Ora 18:00 (24:00 me orën shqiptare), rezultatet e Indianës (të pjesës më të madhe të këtij shteti) dhe ato të Kentakit (pjesës lindore).

Ora 19:00 (01:00 e së mërkurës me orën shqiptare), rezultatet e Floridës (pjesës më të madhe të këtij shteti), Xhorxhias, Indianës (rajonet lindore), Kentakit (Pjesa perëndimore), Karolinës së Jugut, Vermontit, Virxhinias.

Ora 19:30 (01:30 e së mërkurës me orën shqiptare), rezultatet e Karolinës së Veriut, Ohajos dhe Virxhinias Perëndimore.

Ora 20:00 (02:00 e së mërkurës në mëngjes me orën shqiptare), Alabama, Konektikati, Delauer, Distrikti i Kolumbias, Florida (pjesa perëndimore) Ilinoisi, Meini, Marilandi, Masaçusetsi, Miçigani (pjesa më e madhe e shtetit), Misisipi, Misuri, Nju Hempshairi, Nju Xhërsi, Oklahoma, Pensilvania, Dakota e Jugut (pjesa lindore), Tenesi, Teksasi (pjesa më e madhe e shtetit).

Ora 20:30 (02:30 e mëngjesit të së mërkurës me orën shqiptare), Arkansasi.

Ora 21:00 (03:00 e së mërkurës në mëngjes me orën shqiptare), Arizona, Kolorado, Kansasi, Luiziana, Miçigani (zona e vogël e Gadishullit të Sipërm), Minesota, Nebraska, Nju Meksiko, Nju Jorku, Rhode Ajsland South Dakota (Pjesa perëndimore), Teksasi (zona e El Pasos), Uiskonsi, Uajoming.

Ora 22:00 (04:00 e mëngjesit të së mërkurës me orën shqiptare), Idaho (pjesa më e madhe), Ajoua, Montana, Nevada, Dakota e Veriut (rajoni lindor), Oregoni (rajoni lindor), Jutah.

Ora 23:00 (05:00 e mëngjesit të së mërkurës me orën shqiptare), Kalifornia, Havai, Idaho (pjesa tjetër), Dakota e Veriut (rajoni perëndimor), Oregoni (pjesa më e madhe e shtetit), Uashingtoni.

Ora 24:00 (06:00 e mëngjesit të së mërkurës me orën shqiptare), Alaska (pjesa më e madhe e shtetit).