Shkaterrohet arsenali i armeve kimike siriane

Shtëpia e Bardhë ka njoftuar ditën e hënë shkatërrimin e të gjithë arsenalit të armëve kimike siriane vetëm disa javë përpara përfundimit të afatit në anijen amerikane “Cape Ray” në ujërat ndërkombëtare të Mesdheut.

Duke e cilësuar si një arritje të madhe, presidenti i Shteteve të Bashkuara të Amerikës, Barack Obama tha:

“Kemi realizuar qëllimin e përbashkët për të siguruar që regjimi i Assad-it nuk mund të përdorë arsenalin e tij kimik mbi popullin sirian. Ky ishte një mesazh i fortë se përdorimi i këtyre armëve të neveritshme ka pasoja dhe nuk do të tolerohet nga bashkësia ndërkombëtare.

Rreth një vit më parë, Shtetet e Bashkuara dhe aleatët e saj kërcënuan me ndërhyrje në luftën civile të Sirisë, pas dëshmive se forcat e Assad-it kanë përdorur armët kimike kundër zonave të kontrolluara nga rebelët."

Më shumë se 300 persona humbën jetën, pas një sulmi të ndodhur më 21 gusht të vitit të kaluar. Që t’i shmangeshin një ndërhyrjeje të mundshme ushtarake, lideri sirian pranoi propozimin e Sekretarit amerikan të Mbrojtjes, John Kerry, për të lejuar një ekip ndërkombëtar që të hiqte dhe të shkatërronte të gjitha armët kimike, dhe gjithashtu pranoi të mos prodhojë më armë të tilla.

 

Në fund të fjalës së tij, Presidenti Obama i bëri thirrje regjimit të Presidentit Bashar al-Assad që t’u japë fund mizorive ndaj civilëve të pafajshëm.