Shkencetaret; Fondet jo te mjaftueshme

Astrit Lulushi, Zëri i Amerikës

Një grup shkencëtarësh amerikanë shprehin shqetësim se fondet e pamjaftueshme po pengojnë kërkimet në fushën e sëmundjeve të syve dhe mendore. Fondacioni BrightFocus, një organizatë jofitimprurëse publikoi rezultatet e një ankete me përfshirjen e më shumë se 170 shkencëtarëve biomjekësorë.

Ata thonë se mungesa e fondeve të rregullta po rrezikon krijimin e një deficiti për shkencëtarë të kualifikuar, ndërkohë që Amerika mund të përballet së shpejti me një krizë të kujdesit shëndetësor për shkak të sëmundjeve shkatërruese si Alzheimer, degjenerimi makular, dhe glaukoma.

Shkencëtarët besojnë se për këto sëmundje mund të gjenden kura nëse atyre u jepen burimet dhe mjetet e nevojëshme që kërkojnë. Sipas statistikave, gati 20 milionë njerëz në SHBA janë prekur nga sëmundja Alzheimer, degjenerimi makular, ose glaukoma. Ky numër është rritur, ndërsa popullsia plaket, duke kërcënuar familjet, kujdesin shëndetësor dhe ekonominë. Shkencëtarët thonë se zhdukja këtyre sëmundje duhet të jetë një nga përparësitë kryesore në shkallë vendi.

Sipas studimit;
- 94 për qind e shkencëtarëve të anketuar ishin të një mendimi, se mungesa e fondeve federale për kërkime rreth sëmundjeve të trurit dhe syve ka penguar zbulimet shkencore.
- 91 për qind thanë se mungesa e fondeve kërkimore po bën qe shkencëtarët të largohen nga fusha e kërkimeve.
- 96 për qind pohuan se financimet e kufizuara përbëjnë pengesë të lartë të hyrjes së shkencëtarëve të rinj në fushat kërkimore rreth sëmundjeve të trurit dhe të syve.

Studimi thotë se kostoja për trajtimin e sëmundjeve të tilla është shumë më e vogël në krahasim me koston e dështimit për ta bërë këtë. Sipas Fondacionit BrightFocus, kostoja e përgjithëshme e kujdesit shëndetësor vetëm për Alzheimerin është 200 miliardë dollarë në vit dhe pritet të ngrihet në 1 presje 1 trilionë dollarë deri në vitin 2050, nëse zbulime shkencore nuk bëhen të mundura nga fondet kërkimore. Gjithashtu, ndërsa pakësimet buxhetore në fushën kërkimore vazhdojnë, shqetësime ngrihen se talente të një brezi shkencëtarësh po humbasin.