Shqetesime rreth gripit

Astrit Lulushi, Zëri i Amerikës

Zyrtarë amerikanë të shëndetësisë janë të alarmuar pasi stina e gripit ka filluar këtë vit para kohe. Stina e gripit zakonisht fillon në janar.

Kjo, thonë ata, mund të jetë shenjë se stina e gripit këtë vit do të jetë e rreptë dhe më e gjatë.

Gjatë dekadës së fundit lloji i gripit ka qenë i zakonshëm – me përjashtim të rasteve të gripit të derrit H3N2, që ka qenë i lidhur me llojet e gripit të rëndë mes moshave të reja dhe të moshuave.

Pesë shtete – Tenesi, Misisipi, Alabama, Luiziana dhe Teksasi janë prekur tanimë nga gripi, dhe shtetet Misouri dhe Xhorxhia nuk janë shumë prapa me ethe, dhimbje trupi, dhimbje të fytit, bllokim hundësh dhe dhimbje koke – shenjat kryesore të gripit për shumë njerëz.

Por ka edhe një lajm të mirë – vaksina e gripit këtë vit është një mjet i mirë për të luftuar mikrobin. Gjithashtu, meqenëse gripi i sivjetëm është shfaqur para janarit, vaksina kundër gripit duhet parë edhe si një dhuratë për festat e fund-vitit.