Shqiperia merr pjese ne Panairin e Turizmit ne Berlin

Në Berlin u zhvillua panairi i turizmit, në të cilin Shqipëria u përfaqësua me 18 operatorë turistikë ose dyfishin e një viti më parë, si dhe me një imazh të përmirësuar nën logon "Europe's last unturned stone" (Guri i fundit i pazbuluar i Evropës).

Stenda e Shqipërisë, e ngritur nën kujdesin e veçantë të Ministrisë së Zhvillimit Ekonomik, Turizmit, Tregtisë dhe Sipërmarrjes dhe ‎Agjencisë Kombëtare të Turizmit AKT, e vendosur pranë shteteve të rajonit si Mali i Zi, Maqedonia, Kosova, Kroacia, por edhe Italia, tërhoqi vizitorë të shumtë të interesuar për mundësitë që ofron vendi ynë në këtë sektor.

Ministri i Ekonomisë, Arben Ahmetaj, ishte i pranishëm në ceremoninë e hapjes së panairit. Ahmetaj u shpreh i bindur se, falë imazhit tejet të përmirësuar rë vendit, interesi i shfaqur për Shqipërinë është shumë herë më i madh.

“Besojmë gjithashtu se, numri  i turistëve këtë stinë do të ketë një rritje me dy shifra. Jam i bindur që duhet të bëjmë më shumë për imazhin e Shqipërisë, për të afruar sa më shumë turizëm nga vende si Gjermania, Sllovakia, Çekia, Italia, Franca, apo vende të tjera që kanë një numër të madh turistësh dhe kanë një potencial shumë të madh për tregun shqiptar”, tha ministri.

Panairi i Berlinit është një platformë shumë e rëndësishme për prezantimin e vendeve pjesëmarrëse, përcjelljen e imazhit dhe promovimin e vlerave turistike, por edhe një mundësi shumë e mirë për agjencitë e turizmit nga e gjithë bota që të shkëmbejnë eksperiencat dhe të vendosin ura të reja bashkëpunimi, si dhe për operatorët turistikë për lidhjen e kontratave të reja me homologë nga vende të ndryshme.

Këtë vit Shqipëria pret të shënojë një hap cilësor në sektorin e turizmit, duke e shtrirë vëmendjen jo vetëm në rritjen e numrit të turistëve, por edhe në rritjen e cilësisë së tyre dhe zgjerimin e hartës së shteteve nga të cilët do të mirëpresë turistë gjatë një sezoni që do të zgjasë të gjithë vitin, duke promovuar lloje të ndryshëm turizmi krahas atij bregdetar.