Qeveria shqiptare publikoi një material të shoqëruar me grafika dhe skica të blloqeve të mundësive të kërkimit për naftë dhe gaz natyror në të gjithë territorin e vendit. Materiali u publikua në konferencën ndërkombëtare “Albania Oil, Gas & Energy Summit 2015” të zhvilluar në Tiranë, raporton "Illyria Press".
“Blloqet dhe mundësitë e kërkimit” paraqet veprimtarinë e kërkimit të naftës dhe gazit në Shqipëri që në vitet 1903-1913. Asokohe janë kryer edhe studimet dhe shpimet e para gjeologjike për nxjerrjen e naftës dhe gazit. Shpimi i parë u realizua në vitin 1918 në Drashovicë, Vlorë, prej nga u zbuluan sasira nafte në depozitimet oligocenike, në thellësi rreth 200 m.
Ministri Damian Gjiknuri tha në konferencë se pavarësisht zhvillimeve që i quajti “jo shumë optimiste” në botë, Shqipëria ka dhënë sinjale pozitive sa i takon industrisë hidrokarbure. Zoti Gjiknuri veçoi si pritshmëri me shumë rëndësi atë që e cilësoi si “rezultati premtues i kërkimeve të deritanishme në zonën e Shpiragut nga kompanitë Shell-Petromanas”.
Në vitin 2014 në Shqipëri prodhimi i naftës bruto arriti nivelin 1,4 milion ton krahasuar me 1,2 milion ton që kishte qenë në vitin pararadhës 2013. Ndërkohë, po në shifrat krahasimore të viteve 2013-2014, nafta e përpunuar ka qenë 60 mijë ton (2013) me 260 mijë ton (2014).
Ministri tha se këto rezultate dëshmojnë se qeveria e sheh me përparësi industrinë përpunuese, duke dhënë shembullin e rivënies në punë të rafinerive të kompanisë “ARMO”.
Gjiknuri shtoi se me pritjen e investimeve të rritura “në industrinë e rafinimit, parashikohet se përpunimi i naftës për vitin 2015 të arrijë në mbi 700 mijë ton”.
Ministri në fjalën që mbajti iu përgjigj vetë pyetjes që shtroi nëse Shqipëria ka mundësi të pazbuluara: “Mjafton t’u sjell në vëmendje një fakt mjaft të thjeshtë: Në vitin 1974, prodhimi i naftës bruto në vend arriti në 2.2 milionë ton, gati dyfishi i asaj çka nxirret sot. Studimet e hershme gjeologjike, – vijoi ministri – sugjerojnë se rezervat e vendit në naftë dhe gaz arrijnë në mbi 400 milion tonë, nga të cilat vlerësohet se rreth 40 milion ton janë ende lehtësisht të nxjerrshme”.
